Һандарҙа – тормош сағылышы

Ағымдағы йылдың туғыҙ айында районда 266 бала донъяға килгән. Уларҙың 142-һе – малайҙар, 124-е – ҡыҙҙар. Былтырғы ошо уҡ осор менән сағыштырғанда был ике балаға күберәк.
84 бала – ғаиләлә беренсе, 94-те – икенсе, 53-ө – өсөнсө, 22-һе – дүртенсе, 10-ы – бишенсе, икеһе – алтынсы, береһе етенсе бала булып донъяға килгән. Күпселек сабыйҙар тулы ғаиләләрҙә тыуһа, бәпестәрҙе яңғыҙ тәрбиәләүгә 24 әсә йөрьәт иткән.
Ошо уҡ осорҙа 133 кеше вафат булған (78 ир-ат, 55 ҡатын-ҡыҙ). Былтырғы менән сағыштырғанда, был 11 процентҡа түбәнерәк.
Районда барлыҡҡа килгән яңы ғаиләләрҙең һанына килгәндә, улар — 170 (былтырғы күрһәткестән 20,6 процентҡа күберәк). Ҡыҙғанысҡа ҡаршы, айырылышыусылар ҙа юҡ түгел: 54 пар тарҡалған.


Сират бөтәсәк

Ҡалалағы 8-се мәктәптең элекке бинаһы ремонттан һуң 220 сабыйға иҫәпләнгән балалар баҡсаһына әүереләсәк.
Бында тәүге сиратта тәҙрәләр алмаштырыласаҡ, ҡойма яңыртыласаҡ. Учреждение мөдире Фәнисә Грабцова әйтеүенсә, медицина, аҙыҡ-түлек блогын йыһазландырыуға заказ бирелгән. Заман талаптарына яуап биргән “Ҡауҙы” баҡсаһында массаж һәм физиотерапия кабинеттары ла булдырыласаҡ. Ремонт эштәрен йыл аҙағына тамамламаҡсылар. Әйткәндәй, ошо учреждение һәм Көньяҡ биҫтәһендәге яңы балалар баҡсаһы сафҡа инһә, ҡалала мәктәпкәсә учреждениеларға булған сират бөтәсәк.


Йөрөп уҡымаясаҡтар

Сосновка ауылында яңы мәктәп асылды. Унда балалар баҡсаһы өсөн дә урын бар.
Быға тиклем утын менән йылытылған ағас бинала белем биргән уҡытыусылар эш шарттарының яҡшырыуына ҡыуанып бөтә алмай. “Ололар һалҡынға нисек тә түҙһә, балалар бигерәк йәл ине”, – ти педагогтар. Әйткәндәй, үткән уҡыу йылында Сосновка балалары өс саҡрым алыҫлыҡтағы Сухояз ауылына йөрөп уҡыған. Заманға ярашлы яңы мәктәптә 70-кә яҡын бала белем аласаҡ, 20-нән ашыу сабый балалар баҡсаһына йөрөйәсәк.


Йолалар онотолмай

Федоровка районының Алешкино ауылында шәжәрә байрамы үткән. Уны ойоштороуға “Федоровка ауылы” мордва тарихи-мәҙәни үҙәге күп көс һалған.
Ауыл халҡы ҡунаҡтарҙы икмәк-тоҙ, “Совадо, инжеть кудов” (“Ҡунаҡтар, рәхим итегеҙ”) йыры менән менән ихлас ҡаршы алған. Ҡунаҡтар өсөн, мордва милли йолаларына таянып, тамаша әҙерләгәндәр. Уның төп маҡсаты – Ведьава (һыу аллаһы), Вирьава (урман аллаһы), Кудава-Юртава (йорт аллаһы) изгеләренән һаулыҡ, именлек, бәхет һорау.


Беҙҙекеләр бит ул!

Удмурт Республикаһының Ижевск ҡалаһында “Элькуновидение-2012” бәйгеһе үтте. Ул данлыҡлы “Евровидение” телевизион конкурсы һымаҡ ойошторолған, әммә бәйгеселәр фәҡәт удмурт йырҙарын башҡарҙы.
Башҡортостан данын Тәтешле районында тыуып үҫкән һәм әле Ижевск дәүләт медицина академияһында белем алған Лилиана Нуриәхмәтова яҡланы. Унан тыш, бәйгелә тағы ла 21 дәғүәсе көсөн һынаны. Еңеүселәр үҙенсәлекле бүләктәр менән билдәләнде. Шул иҫәптән “Евровидение-2012” конкурсында ҡатнашҡан “Бурановские бабушки” төркөмө лә махсус бүләк әҙерләгәйне.


Яуаплылыҡты арттырыу фарыз

Ҡала прокуратураһы Өфө яғыулыҡ-энергетика колледжының Ағиҙел филиалы ятағында янғын хәүефһеҙлеге ҡағиҙәләре үтәлеүен тикшергән.
Һөҙөмтәлә янғын крандарының тейешле талапҡа яуап бирмәгән йәшниктәрҙә һаҡланыуы, дежур персоналдың электр фонарҙары, тын алыу ағзаларын һаҡлау ҡоролмалары булмауы асыҡланған. Ошоларға яуаплы вазифалы кеше административ яуаплылыҡҡа тарттырылған һәм уға 15 мең һум штраф һалынған.


Һынатманыҡ!

Свердловск өлкәһендә көрәш буйынса “Урал кубогы” бәйгеһе үтте.
Балаҡатай балалар-үҫмерҙәр мәктәбе тәрбиәләнеүселәре һынатманы. Көсөргәнешле ярышта Р.Ҡәҙербаев Татарстандан килгән көслө дәғүәсене еңеп, өсөнсө урын яуланы.