...Ошондай фекерҙә республика хәрби комиссариаты хеҙмәткәрҙәре. Билдәле булыуынса, ваҡытында әрмегә бармай ҡалыусылар араһында үҙ-үҙенә ҡул һалыу, төрлө сектаға эләгеү, юл-транспорт фажиғәләрендә һәләк булыу осраҡтары йышайған. Мәҫәлән, һуңғы осорҙа республикала өс кеше ошондай аяныслы хәлгә тарыған.

Республика хәрби комиссары Анатолий Балтинский матбуғат конференцияһында хәрби хеҙмәттең үҙенсәлектәре хаҡында һөйләне.
Көҙгө саҡырылышта алты меңгә яҡын егет Рәсәй Ҡораллы Көстәренә оҙатылырға тейеш. Хеҙмәт итеү ваҡыты элеккесә ҡала – 12 ай. Рәсәй Оборона министрлығы был мәсьәләгә үҙгәреш индерергә ниәтләмәй. Егеттәр төрлө хәрби округтарға юлланасаҡ. Республикала барлығы 69 хеҙмәткә саҡырыу комиссияһы эшләй.
Көҙгө хеҙмәткә саҡырылғандарҙың әҙерлеген тикшереү өсөн республика Хәрби комиссариатына Генераль штабтан вәкилдәр килгән. Улар әҙерлекте юғары баһалаған, был йәһәттән иң яҡшы субъект тип тапҡан. Элекке йылдар менән сағыштырғанда, быйыл саҡырыу пунктында буласаҡ һалдаттарҙың көнкүреш шарттары күпкә яҡшырған: иҫке һикеләр алмаштырылған, һәр кемдең үҙ кәштәһе һәм ултырғысы бар. Шулай уҡ егеттәр хәрби часҡа китер алдынан банк картаһын ала, ай һайын унда ике мең һум аҡса күсереләсәк.
Хәрби комиссариаттың врач комиссияһы рәйесе Роберт Йыһангиров иһә хеҙмәткә саҡырылғандарҙың һаулығы насар булыуын билдәләне. Яҫы табанлылыҡ, ҡолаҡ-танау сирҙәре, ВИЧ айырыуса таралған. Билдәле булыуынса, республика Хәрби комиссариаты контрактсыларҙың һанын арттырыу буйынса эшләй.
Матбуғат конференцияһында хәбәрселәрҙе министрҙарҙың, хакимиәт башлыҡтарының, эшҡыуарҙарҙың улдары хеҙмәт итеү-итмәү мәсьәләһе ҡыҙыҡһындырҙы. «Социаль статусына, туғанлыҡ ептәренә ҡарамай, бөтәһенә лә тиң ҡарайҙар. Мәҫәлән, әле йәштәр сәйәсәте һәм спорт министры Андрей Иванютаның улы әрме хеҙмәтендә үҙ бурысын үтәй», – тип яуап бирҙе республика хәрби комиссары Анатолий Балтинский.
Хәрби хеҙмәткә саҡырылғандарҙың күпселеге Үҙәк хәрби округка юлланасаҡ. Һауа-десант ғәскәрҙәрендә хеҙмәт итергә теләүселәрҙең һаны арта бара. Ә бына альтернатив хеҙмәткә Башҡортостандан дүрт кеше генә ебәреләсәк.
Хәрби хеҙмәткә көҙгө саҡырыу кампанияһы осоронда граждандарҙың мөрәжәғәттәре буйынса “ҡыҙыу элемтә” телефондары эшләй: республиканың Хәрби комиссариатына – 253-13-48, 228-02-92; Өфө гарнизонының хәрби прокуратураһына – 250-05-10; ашығыс психологик ярҙам кәрәк булһа, 273-09-00 телефонына шылтыратырға мөмкин. Шулай уҡ Хәрби комисcариаттың муниципаль бүлектәрендә лә ҡыҙыу элемтә телефондары бар. Үҙәк хәрби округ ғәскәрҙәре етәксеһенең электрон адресы: priemcenter@mail.ru.