“Яҡшы кешенең ҡунағы бер көндә, тигәндәре шулдыр инде: әле генә ҡәйнәм менән ҡайнымды Стәрлебашҡа оҙатҡайныҡ, бына һеҙ килеп төштөгөҙ...” Шулай һөйләнә-һөйләнә ҡыуанып ҡаршы алды беҙҙе Бүздәк ауылында йәшәгән Лиана Савина. Күп тә үтмәй ире Альберт та эштән ҡайтып инде. Йәштәрҙең беҙҙең менән уртаҡлашырға ҡыуанысы ла бар икән — малайҙары Искәнйәрҙең 40 көнлөгө.

Лиана район үҙәк дауаханаһында акушер-гинеколог булып эшләй, әле декрет ялында. Альберт та ошонда уҡ акушер-гинеколог. Ике йәш йөрәк Өфөлә Башҡорт дәүләт медицина университетында уҡығанда танышҡан.
Стәрлебаш егете Альберт төркөмдәш ҡыҙҙар араһынан уңған, асыҡ күңелле, көләс йөҙлө Бүздәк һылыуы Лианаға шунда уҡ иғтибар итә. Әлбиттә, ҡыҙыҡай ҙа мөһабәт кәүҙәле, теремек һәм шаян егетте тәү күреүҙән үк оҡшата. Улар ҡулына диплом алғас, 2011 йылда ғаилә ҡороп ебәрә. Студент ятаҡханаһында матур итеп йәшәй башлайҙар. Икеһе лә интернатура тамамлай. Артабан ҡайҙа барырға тип оҙаҡ баш ватмайҙар, Бүздәккә ҡайтырға ҡарар итәләр, сөнки Лиана уҡыған сағында уҡ тыуған яғында практика үтә, етәкселәр менән аралаша, эшкә урынлашырға теләге булыуын да йәшермәй. Шуға ла дауахана етәкселеге уларҙың районға ҡайтыуын түҙемһеҙлек менән көтөп ала. Бүздәктә Савиндар ғаиләһе тәүҙә Лиананың ата-әсәһендә йәшәй.
Тәжрибә етеңкерәмәүе сәбәпле, йәш белгестәргә эш башлап китеүе ауыр була, әммә улар төшөнкөлөккә бирелмәй. Өлкәнерәк табиптар уларға һәр саҡ кәңәш бирә, шәфҡәт туташтары ла, санитаркалар ҙа ярҙамынан өҙмәй. Йәштәрҙең торлаҡ мәсьәләһе лә ыңғай хәл ителә — район дауаханаһы етәкселеге Савиндар ғаиләһенә ведомство фатирынан асҡыс тапшыра. Ҡыуаныстың иге-сиге булмай, әлбиттә. Асҡысты алған көндө үк улар йәшәргә күсә.
– Һәр кем үҙ мөйөшөн, ғаилә усағын булдырырға теләй. Беҙ ҙә, атай-әсәйем менән татыу ғына йәшәһәк тә, йыш ҡына айырым торорға ине тип хыяллана инек, шөкөр, фатирлы ла булдыҡ, – ти Лиана. – Атай-әсәй һәр саҡ беҙгә көс-ҡеүәт биреп торҙо, ауыр ваҡытта ярҙамдан да айырманы.
Савиндарҙың өйлө булыу шатлығы бының менән генә сикләнеп ҡалмай. Икеһе лә дауаханала эшләгәс, 2012 йылда ғаиләне “Ауыл табибы” программаһына индерәләр. Шулай итеп, йәштәр дәүләттән бүленгән аҡсаға район үҙәгендә 16 сутый ер һатып ала, июлдә йортҡа нигеҙ һалына. Проектты һайлағанда Лиананың атаһы ярҙам итә. Ике миллион һум аҡса фәҡәт төҙөлөшкә тотонола. Әле Савиндарға өй туйларға күп ҡалмаған: ҡыйығы ҡапланған, түшәме-иҙәне һалынған, эстә биҙәкләү бара. Газ, һыу үтәсәк, нәҡ ҡала фатирындағы кеүек бөтә шарттар буласаҡ. Ике ҡатлы йорт әле үк биҫтәне биҙәп ултыра.
– Беҙҙең урамда башҡа йәштәр ҙә йорт күтәрә, күптәре ауылды социаль яҡлау программаһы буйынса торлаҡлы булды, – ти Альберт. – Шөкөр, дәүләтебеҙ, республика етәкселеге йәштәрҙең торлаҡ проблемаһын хәл итеү маҡсатында яңы программалар ҡабул итә, был үҙ сиратында төпкөл райондарҙа кадрҙарға булған ҡытлыҡты бөтөрәсәк.
Әйткәндәй, “Ауыл табибы” программаһына ярашлы Бүздәк районына былтыр алты белгес ҡайтҡан, быйыл тағы 13-ө эшкә урынлашҡан. Араларында баш ҡаланан ғаиләләре менән күсеп килгәндәр ҙә бар. Әммә медицина белгестәренә ихтыяж һаман да тойола районда: инфекционист, рентгенолог, фтизиатр кәрәк. Теләге булғандар Бүздәк үҙәк район дауаханаһына мөрәжәғәт итә ала.