“Башавтотранс”тың социаль транспорт картаһының яраҡлылыҡ ваҡыты 9 ноябргә тиклем оҙайтылды. Йәмәғәт транспортында йөрөгәндә артабан да льготанан файҙаланырға теләүселәр Башҡортостандың Социаль картаһын (БСК) юллай ала.

— 1 ноябрҙән Башҡортостандың социаль картаһын эшләтеп алыу тиҙләтелде. Ул ғариза тапшырғандан һуң 20 көндә әҙер була, — тип хәбәр итте Башҡортостандың Транспорт һәм юл хужалығы буйынса дәүләт комитеты.
БСК-ны алып өлгөрмәгән осраҡта, 9 ноябргә тиклем ҡала йә ауыл эсендә генә ташламанан файҙаланырға мөмкин. Һуңынан бары тик Башҡортостандың Социаль картаһы булғандар йәмәғәт транспортында льгота нигеҙендә йөрөй аласаҡ. Шуға күрә картаны юллауҙы оҙаҡҡа һуҙмаҫҡа кәңәш ителә.
Социаль ярҙамға хоҡуғы булған граждандар 1 – 9 ноябрҙә “Башавтотранс”, “Өфө ҡалаһының электротранспорт идаралығы”, “Стәрлетамаҡ троллейбус идаралығы”, “Салауат ҡалаһының трамвай идаралығы” предприятиеларының ҡала эсендәге маршруттарында йә льгота хоҡуғын биргән документты, йә пенсия танытмаһын, йә ошо карталарҙың береһен күрһәтергә тейеш: Башҡортостандың Социаль картаһы, “Башҡортостандың социаль карталар регистры”ның выҡытлыса һәм “Башавтотранс”тың социаль транспорт карталары.
— Ҡала-ара транспортында льготанан файҙаланыу өсөн мотлаҡ Башҡортостан Социаль картаһы кәрәк, — тип иҫкәртә Дәүләт комитеты.
Өфөнөң льготаға хоҡуғы булған граждандарына ваҡытлыса карталар Көньяҡ автовокзалда, Дәүләт һәм муниципаль хеҙмәт күрһәтеү буйынса күп функциялы үҙәктә бирелә.
Башҡортостандың Социаль карталарын алыу өсөн йәшәгән ерегеҙ буйынса хеҙмәт һәм халыҡты социаль яҡлау идаралығына йәки “Уралсиб” банкына мөрәжәғәт итегеҙ.
“Башавтотранс”тың башҡа төр карталары (мәктәп уҡыусылары, студенттар өсөн һәм ваҡыты сикләнмәгән карталар) элеккесә ғәмәлдә ҡала.
Ошо мәсьәләләр буйынса һорауҙарҙы бушлай телефон аша асыҡларға мөмкин: 8-800-100-8180.