Үҙидарала уңышҡа өлгәшкәндәр

Башҡортостандың Иҡтисади үҫеш министрлығы иң яҡшы муниципалитеттар исемлеген төҙөгән. Социаль-иҡтисади йәһәттән уңышҡа өлгәшкәндәр аҡсалата бүләкләнәсәк. Гранттарҙың дөйөм күләме 200 миллион һум тәшкил итә. Аҡса республика ҡаҙнаһынан бүленәсәк. Еңеүселәр исемлегендә — Баҡалы, Ҡариҙел, Ейәнсура, Миәкә, Әбйәлил, Саҡмағош райондары. Ҡалалар араһында иң яҡшылары тип Октябрьский һәм Нефтекама билдәләнгән.
Урындағы үҙидара эшмәкәрлеге 150 күрһәткес буйынса баһаланған. Халыҡтың йәшәү сифатын яҡшыртыу, идара итеүҙә яңы алымдар ҡулланыу, мәғариф, мәҙәниәт, һаулыҡ һаҡлау өлкәләрендәге, торлаҡ-коммуналь хеҙмәттәр күрһәтеү буйынса һөҙөмтәләр иҫәпкә алынған.

Яңы автобустарҙа “бишле” алырға!

Ошо көндәрҙә мәктәп автопарктары яңы автобустар менән тулыланды: республиканың һигеҙ районына 14 машина ебәрелде. “ПАЗ” маркалы автобус асҡысы Бишбүләк, Благовар, Благовещен, Бүздәк, Борай, Ғафури, Дыуан, Мәсетле райондары мәктәптәренә тапшырылды.
Яңы уҡыу йылы башланғандан алып райондарға 96 машина ебәрелгән. Йыл аҙағынаса тағы 85 мәктәпте автобус менән тәьмин итәсәктәр. Автопаркты яңыртыу киләһе йылда ла дауам итәсәк. Әлеге ваҡытта республика мәктәптәренә тағы 300 автобус талап ителә.

Китап туйына саҡырабыҙ

Арҙаҡлы ғалим, филология фәндәре докторы, профессор, Башҡортостан Фәндәр академияһы академигы Марат Зәйнуллиндың яңы хеҙмәте — “Башҡорт төрки һәм сағыштырма тел ғилеме” исемле китабы — донъя күрҙе.
Ул ғалимдың Башҡорт дәүләт университетындағы ғилми-педагогик эшмәкәрлегенә 50 йыл тулыу уңайы менән “Ғилем” нәшриәтендә ташҡа баҫылды. Китап туйы бөгөн 16 сәғәттә БДУ-ның тамаша залында уҙғарыла.

Ярыш миҙгеле тамам

Ошо көндәрҙә ДОСААФ мотоклубтары араһында республиканың асыҡ чемпионаты үтте. Унда Өфө, Учалы, Нефтекама, Салауат, Стәрлетамаҡ, Мәләүез, Белорет, Ҡазан, Ырымбур, Силәбе, Төмән ҡалаларынан командалар ҡатнашты.
Ун ете тапҡыр донъя чемпионы исемен яулаған Николай Красников менән донъя һәм Европа чемпионы Дмитрий Буланкиндың ҡатнашыуы ярышҡа мәртәбә өҫтәне. Һөҙөмтәлә Өфөнөң Ғ. Ҡадиров исемендәге Техник спорт төрҙәре үҙәге беренсе, Учалынан “Горняк” — икенсе, Салауат ҡалаһы мотоклубы өсөнсө урынға сыҡты.

Шоферҙарҙың яуаплылығы арта

Авария урынынан ҡасып киткән водителдәр иҫерек килеш руль артына ултырыусыларға тиңләнәсәк. Был хаҡта Рәсәйҙең Дәүләт Думаһы депутаты Вячеслав Лысаков белдергән.
Әлеге тәҡдим парламентта тикшереләсәк. Бынан тыш, ике һәм унан да күберәк кешенең үлеменә килтергән аварияға сәбәпсе водителдең 15 йылға тиклем иркенән мәхрүм ителеүе ихтимал. Тиҙҙән был закон проекты Думала тәүге уҡыуға сығарыласаҡ.

Быйыл сабыйҙар күберәк тыуған

Федераль дәүләт статистика хеҙмәтенән алынған мәғлүмәткә ҡарағанда, сентябрҙә илдә 143 миллион кеше теркәлгән.
Быйылғы туғыҙ айҙа 1 миллион 253 меңдән ашыу сабый донъяға килгән. Былтырғы күрһәткестәр менән сағыштырғанда, был 82 меңгә күберәк. Халыҡ иҫәбе артыуы илдең 80 төбәгендә күҙәтелә.