Күңелле, тантаналы минуттарҙы хәтергә төшөрөп торорға ярҙам иткән иң ҡәҙерле иҫтәлек ул — фотоһүрәттәр. Зауыҡ менән төшөрөлөп, сифатлы итеп эшләнһә, йылдар уҙғас та һоҡланып ҡарарлыҡ. Бына шундай яуаплы, иҫтәлекле мәлдәрҙе мәңгелеккә теркәп ҡуйыуҙы эшҡыуарлыҡ өлкәһе итеп һайлаған Гөлназ менән Рушан Булатовтар. Береһе фотолар өсөн яуаплы булһа, икенсеһе видеояҙмаға төшөрә.

Туй фотографы булыу ниәте Рушанда 2003 йылда уҡ тыуа. Уҡыуын тамамлап, Өфөлә эш эҙләп йөрөгән егеттең күҙенә иғлан салына. Тик фотоаппараты булмағас, эшкә алмайҙар. Әммә был уй күңелендә ныҡлы урын биләй. 2006 йылда, ата-әсәһе тәүге профессиональ “Никон” фотоаппараты бүләк иткәс, хыялы бойомға аша. Тәүге заказсыһы дуҫы була. Күп кенә нескәлекте белмәүе арҡаһында ҡатмарлыҡтар килеп сыға. Дуҫы менән 20 көн буйы, хатта тиҙерәк булһын өсөн береһе — көндөҙ, икенсеһе төндә алмаш-тилмәш эшләйҙәр. Шунан башлана ла инде Рушандың туй фотографы булып китеүе. 2008 йылдан ул — шәхси эшҡыуар. Фото-көнкүреш техникаһы тауарҙары, ашығыс фотоға төшөрөү нөктәһе лә аса. Әлегә, ваҡыт етмәү сәбәпле, уны ябып торғандар, киләсәктә киңәйтеп, компьютер кеүек техника ремонтлау буйынса ла хеҙмәт күрһәтергә иҫәптәре. Был хаҡта һүҙ сыҡҡас, компьютер йүнәтергә нисек өйрәнеүен һораным. Баҡһаң, был һөнәргә лә Рушан үҙаллы төшөнгән икән.
— Мохтажлыҡ мәжбүр итте, — ти ул, йылмайып. Үҫмер саҡта ағаһына алып биргән иҫке компьютер ватылып йонсотҡас, ағалы-ҡустылы икәү уны ҡутарып, боҙолған ерен асыҡларға, рәткә килтерергә өйрәнә. Аҙаҡ инде дуҫ-иштәр, таныш-тоноштар ҙа мөрәжәғәт итә башлай. Ғаиләлә ҡорамалдарҙы, программаларҙы ваҡыт үткән һайын замансараҡҡа алыштырып торалар. Рушандың иһә, ижади кеше булараҡ, киләсәккә уй-ниәттәре бихисап.
— Хакимиәт берәй урындан ер бүлһә, йәш ғаиләләр аллеяһы булдырырға ине, — ти ул. — Туй көнөндә икәүләп ултыртҡан ағастарын аҙаҡ, йылдар уҙғас, балалары менән килеп күрерҙәр, байрамдарын иҫкә алырҙар ине. Шулай уҡ ғашиҡтар, һөйөүҙәренең мәңгелек билдәһе итеп, йоҙаҡ элеп, асҡысын ташлап, йола үтәргә ярата. Шул маҡсатта тимерҙән махсус “мөхәббәт ағасы” эшләп ҡуйғанда һәйбәт булыр ине.
Бына шундай тырыш, маҡсатлы, мөхәббәтле йәштәр йәшәй беҙҙең яҡтарҙа. Ундайҙарҙың уй-ниәттәре тормошҡа ашыр, эшҡыуарлыҡ төрө тағы ла киңәйер тигән өмөт бар.