Ошо көндәрҙә Башҡортостан Президенты Рөстәм Хәмитов Башҡортостан Хөкүмәтен отставкаға ебәреү тураһында Указға ҡул ҡуйҙы. “Был сәйәси ваҡиғаны нисек баһалайһығыҙ?” – тигән һорау менән гәзит уҡыусыларыбыҙға мөрәжәғәт иттек.

Альберт МИФТАХОВ, “Берҙәм Рәсәй” партияһының төбәк башҡарма комитеты етәксеһе:
— Башҡортостанда башҡарма власть етәксеһе — Президент. Ә премьер-министр вазифаһы булғанда башҡарма власть органдары икегә бүленә. Шулай уҡ хөкүмәт аппаратын тотоу ҙа ҡыйбатҡа төшә. Хәҙер иһә был маҡсатҡа бүленгән бюджет аҡсаһы кәрәкле өлкәләргә тотоноласаҡ. Ошоғаса министрҙар ниндәйҙер мәсьәләне вице-премьерға, унан премьер-министрға, ул иһә Президентҡа еткерә ине. Шулай итеп, бюрократизм күп ваҡытты ала торғайны. Министрҙарҙың туранан-тура Президентҡа буйһоноуы күп мәсьәләләрҙе хәл итеүҙә эште тиҙләтәсәк тигән фекерҙәмен. Әлеге үҙгәрештәргә бәйле Президенттың эше күбәйһә лә, күпселек мәсьәләләр Президент күҙлегенән һәм ул нисек күрә, шулай тормошҡа ашасаҡ. Шуға ла Рөстәм Хәмитовтың был ҡарарын хуплайым.
Наталья БИБАКОВА, Өфө дәүләт авиация техник университетының философия кафедраһы доценты, политолог:
— Донъя миҫалында Хөкүмәттең отставкаға ебәрелеүе — ҙур сәйәси ваҡиға. Ә ниндәй киҫкен ваҡиға бындай хәлгә нигеҙ була ала? Кризис, ҙур сәйәси хата йәки илдә алып барылған сәйәси система етди үҙгәрештәргә мохтаж булғанда. Башҡортостанда Хөкүмәттең ни сәбәптән отставкаға ебәрелеүенә аныҡ нигеҙ юҡ. Шуға ла мин һуңғы вариантҡа туҡталам. Моғайын, республика етәксеһе әлеге Хөкүмәттең эше менән ҡәнәғәт түгелдер. Сәйәси фараздарға килгәндә, миңә ҡалһа, әлеге Хөкүмәт составында эшләүселәрҙең күбеһе үҙ урынында ҡаласаҡ.
Илдар ҒАФУРОВ, эшсе:
— Илдә оптималләштереү барған саҡта Хөкүмәт аппаратын ҡыҫҡартыу, бәлки, дөрөҫтөр. Әммә был эшкә әле генә баһа биреп булмай. Тәүҙә эшләп ҡараһындар. Әлбиттә, бюрократизм кеүек күренеш кәмер тип ышанам. Быға бер йылдан һығымта яһарға булыр. Чиновниктарға киткән сығымдар социаль өлкәгә йүнәлтелһә, яҡшыраҡ булыр ине, тип уйлайым.
Әнүәр МӨХТӘРОВ, Өфө районы, хаҡлы ялда:
— Ниһайәт, ҡағыҙ әйләнеше туҡтап ҡалыр тигән өмөт бар. Авдон ауылында бына 30 йыл самаһы төҙөлөп бөтмәгән физкультура-һауыҡтырыу комплексы тора. Шул хаҡта нисә йыл инде Президентҡа хат яҙам, ләкин аһ-зарым республика етәксеһенә барып етмәй, Хөкүмәттән район хакимиәтенә кире ебәрелә. Мин туплаған хаттар хәҙер бер нисә томлыҡ китап һымаҡ булды. Президент был ҡарары менән чиновниктар армияһын ҡыҫҡартып, минеңсә, һәйбәт эшләй.
Айҙар ӘКРӘМОВ, Мәскәү ҡалаһы, студент:
— Бындай ҡыҫҡартыуҙар федераль кимәлдә лә, төбәктәрҙә лә булырға тейеш. Хәҙер компьютер, телефон заманы. Шуға ҡағыҙ менән эш итеү системаһынан яйлап ситләшергә ваҡыт. Кеше менән хатлашып түгел, онлайн аралашырға ла була бит. Хөкүмәттә башланған ҡыҫҡартыу министрлыҡтарға ла ҡағылыр тип уйлайым, сөнки бер-береһенең эшен ҡабатлаған министрлыҡтар, улар эргәһендә булдырылған агентлыҡтар, бюролар күп. Бюджет аҡсаһы маҡсатлы файҙаланылырға тейеш.