“Ауыл табибы” программаһы республикала 1 ғинуарҙан эшләй башланы. Был проект йәш белгестәр араһында ҙур ҡыҙыҡһыныу тыуҙырҙы, сөнки ошо арауыҡта күп кенә район-ауыл дауаханаларына юғары белемле белгестәр эшкә килде.

Башҡортостан Хөкүмәтенең 2011-2012 йылдарҙа юғары уҡыу йортон тамамлап, республика ауылдарына эшкә ҡайтҡан 35 йәшкә тиклемге медицина хеҙмәткәрҙәрен аҡсалата дәртләндереү тураһындағы ҡарарына ярашлы, биш йыл дауамында ауыл ерендә эшләргә теләк белдергән белгестәргә бер миллион һум күләмендә бер тапҡыр компенсация бирелә.
Балтас районында ла яңы ғына юғары уҡыу йортон тамамлап, яҙмышын ауыл менән бәйләгән медицина белгестәре етерлек. Салауат Ғилметдинов – ана шундайҙарҙың береһе, район үҙәк дауаханаһында анестезиолог-реаниматолог.
Юғары белем алғанға тиклем Салауат райондың Көндәшле мәктәбен тамамлай. Дуҫ-иштәре хәҙерге заманда абруйлы һәм аҡсалы һөнәрҙе һайлағанда, ул Бөрө медицина колледжына уҡырға инә. Егет уны уңышлы тамамлап, Көндәшлелә фельдшер булып эш башлай. Уңған, тырыш, һәр саҡ яңы идеялар менән янған йәш егетте хеҙмәттәштәре ихтирам итә. Ауылдаштары араһында ла абруй яулай. Айырыуса баш табип Любовь Зуева егеттең эште урыны-еренә еткереп башҡарыуын күреп, юғары белем алырға тәҡдим итә. Салауат икеләнеп тормай, туғандары менән кәңәшләшкәндән һуң документтарын медицина университетына тапшыра, етмәһә, баш табип маҡсатлы йүнәлтмә алып биреүҙә ярҙам итә.
Университетта тырышып белем ала егет, бер лекцияны ла ҡалдырмай, лаборатория эштәрендә әүҙемлек күрһәтә, уҡыу йортонда ойошторолған сараларҙан ситтә ҡалмай. 2008 йылда ул Башҡорт дәүләт педагогия университетында уҡыған Альбина исемле ҡыҙға өйләнә. Йәштәр студент ятағында матур итеп донъя ҡороп ебәрә. 2010 йылда Салауат Ғилметдинов Башҡорт дәүләт медицина университетының дауалау факультетын тамамлап, уҡыуын интернатурала дауам итә. 2011 йылда ҡулына диплом алғас, район үҙәгенә эшкә ҡайта. Республикала ул ваҡытта “Ауыл табибы” программаһы ҡабул ителмәгән була әле. Салауат – район үҙәк дауаханаһына, ә Альбина Иҫке Балтас ауылының 1-се мәктәбенә эшкә урынлаша.
– Эш башлап китеүе ауырҙан булманы, Бөрөлә алған белемдең дә файҙаһы ҙур, – ти йәш табип Салауат Фоат улы. – Бала саҡтан табип булырға хыялланмаһам да, яҙмышымды ошо һөнәр менән бәйләүемә һис үкенмәйем. Кеше ғүмере өсөн яуаплылыҡ тоям. Ҡулдарымдың шифаһын алып һауығып сыҡҡандарҙы күреп ҡыуанам.
Бер йыл эшләгәс, Салауатты “Ауыл табибы” программаһына индерәләр, уға ярашлы бер миллион һумлыҡ компенсация бирелә. Ғилметдиновтар ғаиләһенең шатлығының сиге булмай, сөнки йәштәр өсөн торлаҡ мәсьәләһе киҫкен торған. Шуға ла ошо форсаттан файҙаланып, Салауат менән Альбина район үҙәгендә яңы йорт һатып ала. Аҡсаның бер өлөшө өй эсен биҙәкләүгә китә. Уларға 15 сутый ерҙә рәхәтләнеп баҡса үҫтерергә лә мөмкинлек бар. Йәшәү шарттары ҡаланыҡынан һис тә ҡалышмай: һыу, газ – йорт эсендә. Ауыл ерендә тыуып үҫкән егет иң тәүҙә мунса, гараж һәм ҡош-ҡорт өсөн һарай төҙөп ултырта.
– Хоҙайға шөкөр, фатирлы булдыҡ, иркен, заманса йортта йәшәргә күптән хыяллана инек. Өс йәшлек Артур улым да, атай-әсәйем дә бигерәк һөйөндө, – ти Салауат Ғилметдинов.