Башҡортостан Президенты Рөстәм Хәмитов эш сәфәре менән Сибай ҡалаһында булды.

Билдәле булыуынса, тап Сибай төбәгендә, Ҡарағайлы йылғаһының Төйәләҫкә ҡойған урынындағы яланда, 200 йыл элек 1500 кешенән торған өс полк төҙөлгән. 1812 йылғы Ватан һуғышының юбилейы айҡанлы билдәле тарихсы Рамаҙан Үтәғолов быйыл ҡалала башҡорт яугирҙәренә һәйкәл төҙөү тәҡдиме менән сығыш яһай. Ҡала хакимиәте ярҙамында тиҙ арала һәйкәлде төҙөү эштәре башлана. Бейеклеге 3,5 метр тәшкил иткән скульптура ҡомартҡыһын ҡуйыу өсөн ҡаланың иң матур урыны һайлап алына. Мәскәү скульпторы Вадим Кириллов етәкселегендәге коллектив башҡарған мөһабәт һын – атта һыбай сапҡан башҡорт яугире – батырҙарыбыҙҙың ҡаһарманлығын данлай, йәш быуында атай-олатайҙарыбыҙ өсөн ғорурлыҡ тойғоһо уята.
1812 йылғы башҡорт яугирҙәренә арналған һәйкәлде асыу тантанаһында Башҡортостан Президенты Рөстәм Хәмитов халҡыбыҙҙың тарихи үткәненә, уның бөгөнгөһөнә һәм киләсәгенә битараф булмағандары, республикала тәүгеләрҙән булып Ватан һуғышы батырҙарына һәйкәл төҙөгәндәре өсөн сибайҙарға рәхмәт әйтте һәм киләсәктә был урын ҡала халҡының ғына түгел, килгән ҡунаҡтарҙың да иң яратҡан еренә әүерелер тигән ышаныс белдерҙе.
Артабан Республика Президенты Сибай тау-байыҡтырыу комбинаты эшселәре өсөн төҙөлгән Көньяҡ биҫтәһендәге 35 фатирлы йортто ҡараны. Хеҙмәткәрҙәр дөйөм хаҡының ун процентын индереп, ҡалған сумманы ун йылға процентһыҙ түләү юлы менән фатирлы буласаҡ. Оҙаҡ йылдар шахтер булып эшләгән Наил Ниғмәтуллинға икеләтә бәхет йылмайҙы тиергә була. Ҡатыны Наташа, улдары Роман һәм Денис менән ике бүлмәле фатирға күсеп тә өлгөргәндәр. Шуныһы ҡыуаныслы: ошо уҡ йортта, шул уҡ ҡатта уның бер туған ағаһы Раил да (ул да шахтер булып эшләй) өй туйлаясаҡ. Яңы фатир алыусыларҙы Рөстәм Хәмитов ихлас ҡотлап, иң ҙур теләген еткерҙе:
— Бында сабый тауыштары һәм балаларҙың шат көлөүе яңғырап торһон! Нигеҙегеҙ ҡотло, эштәрегеҙ уң булһын!
Президент Сибай ҡалаһы буйлап сәфәрен «Ирәндек» боҙ һарайында һәм реконструкция эштәренән һуң яңы асылған «Сбербанк» бинаһында дауам итте. Ҡалала «Сбербанк»тың ете филиалы эшләй. Клиенттар өсөн бөтөн уңайлыҡтар тыуҙырылған, заманса йыһазландырылған банктың барлыҡ филиалдары ла киләсәктә ошондай буласаҡ тигән ышаныс белдерҙе «Сбербанк» етәкселеге.
«Ирәндек» боҙ һарайында Башҡортостан Президенты Рөстәм Хәмитов беренсе тапҡыр ғына түгел. Ҡасандыр боҙҙа тәүге хәрәкәттәрҙе яһай башлаған фигуралы шыуыу, шорт-трек секцияларында тәрбиәләнеүселәр был юлы республика етәксеһенә ғәжәйеп программа тәҡдим итте. Тимәк, киләсәктә Сибай спортсылары республика ла ғына түгел, хатта ил буйынса ҙур еңеүҙәр яулаясаҡ тигән ышаныс тыуа.
Матур тирмәләр ҡуйылған, һәр ерҙә йыр-моң яңғыраған майҙанда үткән Ҡала көнө байрамында республикабыҙ Президентын сибайҙар ихлас ҡаршы алды. Балаларҙың шат тауышы яңғыраған тирмә янына инеп, Рөстәм Зәки улы яңылышманы. Бында уларҙы Сибай ҡала сәнғәт мәктәбенең «Йәйғор» фольклор ансамбле (етәксеһе – Зөһрә Килмөхәмәтова) тәрбиәләнеүселәре көтә ине. Малайҙар һәм ҡыҙҙар мәртәбәле ҡунаҡтың үҙен «Аҡ тирәк, күк тирәк» уйынына саҡырып, «Беҙгә Президент Рөстәм Хәмитов кәрәк!» тип, республика башлығын бер аҙға ғына булһа ла бәхетле бала саҡ иленә әйҙәне.
Ҡала ойошмалары һәм предприятиелары, шәхси эшҡыуарҙар ойошторған күргәҙмәләрҙе ентекле ҡарап, уларҙың эше, проблемалары менән яҡындан танышты Рөстәм Хәмитов. Республика етәксеһен «Буранбай» туристик компанияһы, йылы һәм йомшаҡ быймалар етештергән шәхси эшҡыуарҙар айырыуса ҡыҙыҡһындырҙы.
Рөстәм Зәки улының ҡулынан щулай уҡ төрлө уҡыу йорттарында белем алған алдынғы студенттар – Президент стипендияһы, күп балалы ғаиләләр торлаҡ шарттарын яҡшыртыуға сертификат алып һөйөндө.