Башҡа сара юҡ

Өфөлә 2025 йылға тиклем 30 юл өҫтө һәм юл аҫты үткелдәре барлыҡҡа киләсәк, тип вәғәҙә итә ҡала властары.
Транспорт хәрәкәте йылдан-йыл әүҙемерәк була барғанға күрә, баш ҡаланың ҙур магистралде йәйәү киҫеп үтә торған урындарында ошондай ҡоролмалар төҙөмәй сара юҡ.
Әлеге ваҡытта "Үҫмерҙәр китапханаһы", "Дан бульвары" туҡталыштарында төҙөлөш бара. Киләһе йыл Октябрь проспектының "Рәми Ғарипов исемендәге гимназия", "Мир" фирмаһы" туҡталыштарында ла юл аҫты үткелдәре төҙөй башламаҡсылар.


Мөмкинлектәр күбәйә
Башҡортостанда иғлан ителгән Имен бала саҡ һәм ғаилә ҡиммәттәрен нығытыу йылын Белоретта лайыҡлы ҡаршыланылар: ҡалала бер нисә йыл рәттән өр-яңы балалар поликлиникаһы һәм бала табыу йорто уңышлы эшләй.
Июлдә Ермиловтарҙың күп балалы ғаиләһенә республика етәкселеге ҙур, бөтә уңайлыҡтары булған коттедж асҡысы тапшырҙы, ә күптән түгел улар микроавтобуслы булды.
Сентябрҙә иһә 220 бала Лиза Чайкина урамындағы өр-яңы балалар баҡсаһына барҙы. Үҙәнбашта яңы мәктәп төҙөлә, шулай уҡ М.Ғафури урамында, Абҙаҡта һәм Инйәрҙә яңы балалар баҡсалары сафҡа индереләсәк.


Чемпиондар тәрбиәләйәсәкбеҙ!
"Халыҡ проекты" буйынса Ҡалтасыла роллер трассаһы төҙөлдө.
Киңлеге 6 метр тәшкил иткән спорт ҡоролмаһын сафҡа индереүҙе Нефтекама ҡалаһының "Танып" акционерҙар йәмғиәте үҙ өҫтөнә алған. Трасса парк биләмәһендә урынлашҡанға күрә, майҙанды ағастарҙан һәм ҡыуаҡтарҙан таҙартырға, 500-гә яҡын йөк машинаһы ҡырсынташ түгергә, асфальт һалырға тура килгән. Спорт һөйөүселәргә ҡараңғынан да ҡурҡаһы түгел: роллер трассаһының тирә-яғы 40 фонарь менән яҡтыртыла.


Енәйәткә тиң
Вәкийәр ауылына барғанығыҙ бармы? Юл күркәм урындан – урман буйынан үтә. Әммә күптән түгел ошо төбәктә булып, халыҡтың аяуһыҙлығына һәм битарафлығына хайран ҡалып ҡайттыҡ.
Ауылға етер алдынан, урман буйында, ҙур сүп-сар өйөмө хасил булған, халыҡ һис тартыныуһыҙ көнкүреш ҡалдыҡтарын шунда бушата. Бер аҙ аҫтараҡ ағыусы шишмә ҡороған, сөнки уның юлында – сүп-сар тауҙары. Тирә-яҡ мөхитте һаҡлау, экология мәсьәләләре киҫкенләшкән заманда вәкийәрҙәрҙең күрәләтә тыуған ерен бысраҡҡа батырыуы енәйәткә тиң.


Ил төкөрһә, күл була
Аҫҡар ауылы халҡы берҙәм: майҙа мәсеткә микрофон алырға һөйләшеп, һәр йорттан 100-әр һум аҡса йыйырға ҡарар иткәйнеләр. Шөкөр, берәү ҙә ярҙамһыҙ ҡалдырманы – хәҙер ауылда аҙан тауышы яңғырап тора.
Йәй аҙағында шулай уҡ ауыл халҡы берләшеп зыяратты тәртипкә килтерҙе, өмәлә ирҙәр ҙә, ҡатын-ҡыҙҙар ҙа әүҙем ҡатнашты. Элек-электән дәррәүлеге менән айырылып торған аҫҡарҙар киләсәктә лә ошо сифатын юғалтмаһын ине.


Уҡымлы һәм тормошсан
Яҡташыбыҙ Рәйес Байгилдин, күптән түгел генә район яҙыусылар ойошмаһы ағзаһы булып китеүенә ҡарамаҫтан, икенсе шиғырҙар йыйынтығы сығарҙы.
"Тыуған яғым – яҡты моңом" тип аталған тәүге китап яҡындарына, бала саҡ хәтирәләренә бағышланһа, "Тормошом миҙгелдәре" тип аталған икенсе баҫма йәшәйеш тураһындағы уйланыуҙарҙан тора.
Рәйес Байгилдин һөнәре буйынса – страховка агенты. Уға төрлө кешеләр менән танышырға, аралашырға тура килә. Тормош ыңғай күренештәрҙән генә тормай – ҡайһы бер ҡыҙғаныс осраҡтарҙы ул сатирик әҫәрҙәрендә сағылдыра. Иң мөһиме – яҡташыбыҙҙың һәр әҫәре уҡымлы һәм тормошсан.


Тәмәке тартам тип...
Шишмә районында иҫерек гастарбайтер магазинға тәмәке алырға юлланған. Әммә... йәйәү түгел, ә "Белорусь" тракторында, етмәһә, уға картуф ҡаҙый торған ҡоролма тағылған булған.
Тик 29 йәшлек үзбәк уҙаманы "ҡорос ат"ҡа идара итә алмайынса бер ни тиклем барғас, юл ситенә төшөп киткән. Хоҡуҡ һаҡлау хеҙмәткәрҙәре иҫерек эшсенең водитель танытмаһы булмауын да асыҡлаған. Үҙенсәлекле ысул менән магазинға йөрөргә яратыусы егет ун тәүлеккә ҡулға алынған, енәйәт эше ҡуҙғатылған.