Һуңғы алты йылда илдә һаулыҡ һаҡлау өлкәһенә иғтибар бермә-бер артты. 2006 йылдан алып “Һаулыҡ” өҫтөнлөклө милли проектының бойомға ашырылыуы, 2011 — 2012 йылдарға Рәсәй төбәктәренең һаулыҡ һаҡлауҙы модернизациялау программаһын үтәүгә 620 миллиард һум бүленеүе ыңғай һөҙөмтә бирә башланы. Быны иҫбатлар өсөн ошо осорҙа Рәсәй халҡының ғүмере дүрт йылға оҙайыуын билдәләү ҙә етә. Өфө ҡалаһында өс йыл самаһы элек сафҡа ингән 2-се поликлиника — медицина өлкәһен үҫтереүгә, халыҡтың ғүмерен оҙайтыуға һәм сәләмәтлеген нығытыуға йүнәлтелгән сәйәсәттең күркәм бер сағылышы.

Сират күптән онотолған

Поликлиника заман талаптарына ярашлы төҙөлгән, барлығы 47 600 кешене хеҙмәтләндерә, көнөнә 810 пациентты ҡабул итеү һәләтенә эйә. Шуныһы ғәжәп: мөрәжәғәт итеүселәр күп булыуға ҡарамаҫтан, сират бөтөнләй күҙәтелмәй. Был — һаулыҡ һаҡлауҙы яңыртыуҙың федераль программаһы һөҙөмтәһе.
— Беренсе ҡатҡа видеокамера ҡуйылды һәм компьютерыма тоташтырылды. Хәҙер пациенттарҙың нисек хеҙмәтләндерелеүен кабинеттан сыҡмайынса күҙәтергә мөмкин, — ти поликлиниканың баш табибы Әнисә Сәхәбетдинова.
Өс йыл самаһы элек барлыҡҡа килгән “Дөйөм регистратура” системаһы ла табиптарҙың эшенә ыңғай йоғонто яһай. Телефон йәки электрон почта аша яҙылыу ҡаланың һаулыҡ һаҡлау учреждениеларындағы ығы-зығыны кәметте. Һәр кем әйтелгән ваҡытҡа килеп, табипҡа сиратһыҙ күренә. Яңылыҡҡа тиҙ ҡулайлашырға өйрәнгән 2-се поликлиника социаль карталарҙы хеҙмәтләндереүгә лә тулыһынса әҙер. Пациент хаҡындағы барлыҡ мәғлүмәтте һаҡлаған карта яҙыу мәшәҡәтен кәметәсәк.
— Поликлиника пациенттар һәм табиптар өсөн уңайлы итеп төҙөлгән, — тип дүрт ҡатлы ыҡсым бина менән таныштыра Әнисә Әхмәҙи ҡыҙы. — Кешеләргә бер корпустан икенсеһенә йүгереп йөрөргә кәрәкмәй, сөнки белгестәрҙең барыһы ла бер урында. Физик мөмкинлектәре сикләнгәндәр ҙә иркенләп йөрөй ала: лифт эшләй, һәр ерҙә пандус ҡуйылған.
Поликлиникала шулай уҡ көндөҙгө стационарға урын булдырыуға өлгәшкәндәр. 60 урынға иҫәпләнгән бүлексә эш көнөнән һуң да халыҡты ҡабул итә.

Йәштәр ағыла

Былтыр поликлиникаға 15 йәш белгес эшкә килгән. Учреждение етәкселеге уларға юғары эш хаҡы ла, торлаҡ та вәғәҙә итмәгән, бары тик ҡолас йәйеп эшләү өсөн уңайлыҡтар булдырған. Мәскәү, Ярославль ҡалаларындағы шәхси клиникаларҙа тәжрибә туплап, быйыл тыуған яғына ҡайткан колопроктолог Йәмил Нәбиуллин да хеҙмәт юлын фәҡәт ошонда дауам итергә булған.
— Айырым кабинетым бар, ундағы заманса ҡорамалдар күптәрҙе еңелсә операция ярҙамында йәки бөтөнләй операцияһыҙ дауаларға мөмкинлек бирә, — ти йәш табип.
Көндөҙгө стационар бүлексәһе мөдире, һаулыҡ һаҡлау отличнигы Галина Мирянова, тар белгестәр буйынса мөдир Мәрйәм Ғәзизова, баш шәфҡәт туташтары Марина Караульщикова, Зилә Зараева, өлкән шәфҡәт туташы Фирүзә Рәхимйәнова, табип-рентгенолог Роза Исмәғилева, лаборант-рентгенолог Линара Йәмилева, шәфҡәт туташы Татьяна Васькова, участка табиптары Виктор Усманов, Алевтина Филипповых кеүек бер нисә тиҫтә йыл һаулыҡ һаҡлау өлкәһендә эшләүсе белгестәр үҙҙәренең тәжрибәһен йәштәр менән ихлас уртаҡлаша.
Дөйөм алғанда, поликлиника табиптарға ҡытлыҡ кисермәй. Уға беркетелгән пациенттар кардиолог, невролог, офтальмолог, хирург, онколог, стоматолог, травмотолог-ортопед, акушер-гинеколог, дерматовенеролог, инфекционист, эндокринолог, онколог, уролог, флеболог кеүек тар белгестәргә күренеү мөмкинлегенә эйә.
Хеҙмәткәрҙәренә уңайлы эш шарттары булдырған, уларҙың хеҙмәт хоҡуғын һаҡлаған һәм эштә йәрәхәтләнеү осраҡтары теркәлмәгән учреждение быйыл Башҡортостан дәүләт хеҙмәт инспекцияһының Ышаныс сертификаты менән бүләкләнде.

Иҫкәртеү отошлораҡ

2009 йылда Рәсәйҙең Һаулыҡ һаҡлау һәм социаль үҫеш министрлығында “Сәләмәтлек үҙәктәрен ойоштороу тураһында”ғы бойороҡ ҡабул ителгәйне. Уға ярашлы, Башҡортостанда 17 сәләмәтлек үҙәге барлыҡҡа килде. Тәүгеләренең береһе Өфөнөң 2-се поликлиникаһында асылды.
— Сәләмәтлек үҙәгенең бурысы — кешеләргә ғүмерен оҙайтырға ярҙам итеү, сирҙәрҙе иҫкәртеү, халыҡтың йәшәү сифатын яҡшыртыу. Бында тикшеренеү үтергә, табип кәңәшен алырға мөмкин. Бойороҡҡа ярашлы, илдең ҡайһы төбәгендә йәшәүҙәренә ҡарамаҫтан, мөрәжәғәт итеүселәрҙең барыһын да ҡабул итәбеҙ. Хеҙмәтләндереү тулыһынса бушлай, — ти баш табип урынбаҫары Зилә Шәрәфетдинова.
Поликлиника табиптары йөкмәтелгән бурысты күңел һалып башҡара, халыҡты сәләмәт тормошҡа ылыҡтырыу буйынса өҙлөкһөҙ эш алып бара. Мәҫәлән, быйыл улар ҡала туҡталыштарында тәмәке тартыусыларға никотиндың зарарын аңлатыу һәм тәмәкеләрен алмаға алмаштырыу акцияһын уҙғарҙы. Күптән түгел поликлиникаға килеүселәр менән ҡала буйлап йәйәү йөрөп алдылар һәм хәрәкәтләнеүҙең файҙаһын аңлаттылар.
Ғөмүмән, 2-се поликлиникала һаулыҡ һаҡлауҙың яңыра башлауы төҫмөрләнә.