Рәсәйҙең иң яҡшы иретеп йәбештереүсеһе билдәләнде

Хәҙерге заманда иретеп йәбештереүсе һөнәре иң кәрәкле һәм яуаплыларҙан һанала. Бөгөн бөтә донъя тик тимерҙән генә тора тиерлек. Унһыҙ бейек йорттарҙы, биналарҙы, машиналарҙы, караптарҙы, һыу-газ үткәргестәрҙе осратмаҫһың. Иретеп йәбештереүселәр төҙөлөш майҙандарында, машина, карап төҙөүҙә, энергетика өлкәһендә көс түгә. Был һөнәр һәр ҡайҙа кәрәк, шуға ла хеҙмәт баҙарында иретеп йәбештереүсе ҙур ихтыяж менән файҙалана.

Өфөлә 1 – 5 октябрҙә үткән Бөтә Рәсәй "Һөнәре буйынса иң яҡшыһы" оҫталыҡ конкурсында Рәсәйҙең 78 төбәгенән 200-гә яҡын оҫта "Иң яҡшы иретеп йәбештереүсе" номинацияһында көс һынашты. "Свартэкс" асыҡ акционерҙар йәмғиәтендә конкурсты асыу тантанаһында Башҡортостан Хөкүмәте Премьер-министры урынбаҫары Фидус Ямалетдинов, республиканың хеҙмәт һәм халыҡты социаль яҡлау министры Ленара Иванова, башҡа рәсми кешеләр ҡатнашты.
– Элек-электән оҫталар араһында төрлө бәйгеләр үткәреү йолаһы йәшәп килә, бындай конкурста иң яҡшылар билдәләнә. Ябай эшсе һөнәре ил иҡтисадын үҫтереүҙә ҙур роль уйнай. Әле иретеп йәбештереүсенең хеҙмәте файҙаланылмаған бер генә сәнәғәт тармағын да күҙ алдына килтереп булмай, – тине Фидус Ямалетдинов.
Мәртәбәле сара Рәсәй Хөкүмәте тарафынан эшсе һөнәренең абруйын күтәреү, йәштәрҙе эшкә ылыҡтырыу маҡсатында йыл һайын ойошторола. Өфө ҡалаһы конкурс үткәреү урыны итеп осраҡлы һайланмаған, сөнки тап бынан 60 йыл элек бында тәүге Бөтә Рәсәй иретеп йәбештереүселәр мәктәбе асыла. Бөгөн был һөнәргә баш ҡаланың "Свартэкс" йәмғиәтенең һөнәри әҙерлек үҙәгендә уҡыталар.
Бәйге барышында йәмғиәттең уҡыу корпустарында ҡыҙыҡлы һәм файҙалы күргәҙмә эшләне. Һәр теләгән кеше унда булып, заманса йәбештереү ҡорамалдары, төрлө материалдар менән таныша алды.
Көсөргәнешле бәйге оҫталар араһында ике этапта үтте. Беренсеһендә улар торбаларҙы йәбештереүҙә оҫталығын һәм белемен күрһәтһә, икенсеһендә хеҙмәтте һаҡлау буйынса һорауҙарға яуап бирҙе. Рәсәйҙең төрлө төбәктәрендә еңеү яулаусыларҙың эшен 40-ҡа яҡын эксперт күҙәтте һәм ғәҙел баһа бирҙе. Ҡорос нервыға, көслө ҡулға һәм үткер күҙгә эйә булыусы оҫталар конкурста һынатманы, һәр береһе еңеүгә ынтылды. Әммә бәйге еңеүсеһеҙ булмай тигәндәй, кис баш ҡаланың "Нур" театрында еңеүселәр асыҡланды.
Рәсәй Хөкүмәте тарафынан ойошторолған бәйгелә Рәсәйҙең иң яҡшы иретеп йәбештереүсеһе исеменә Ырымбур өлкәһенән Максим Осипов лайыҡ булды. Икенсе-өсөнсө урындарҙы Башҡортостандан Валерий Артюхов менән Татарстандан Евгений Владимиров бүлеште. Конкурс тамамланды, еңеүселәр асыҡланды, әммә бәйгелә ҡатнашҡан һәр кем еңеүсе, үҙ эшенең оҫтаһы булды.

Виктор ЗАЯЦ, "Свартэкс" асыҡ акционерҙар йәмғиәтенең иретеп йәбештереү сәнәғәте буйынса һөнәри белгестәр әҙерләү үҙәгенең генераль директоры урынбаҫары:
– Бөгөн эшсе һөнәрҙәргә, шул иҫәптән иретеп йәбештереүселәргә лә, ихтыяж артҡандан-арта. Ҡайһы бер уҡыу йорттарында был һөнәргә конкурс ҙур, хатта бер урынға биш кеше тура килә. Хеҙмәт хаҡы ла юғары, әлбиттә. Мәҫәлән, ҡалала иретеп йәбештереүсе 25 меңдән алып 40 мең һумға тиклем эш хаҡы алһа, вахта ысулы менән эшләүселәрҙеке 60-100 меңгә ҡәҙәр барып етә. Абруйлы, табышлы һөнәрҙәрҙең береһе ул.
Валерий АРТЮХОВ, Өфө ҡалаһы:
– Бөтә Рәсәй кимәлендәге конкурстарҙа етенсе йыл ҡатнашам, бер нисә тапҡыр еңеү менән дә ҡайттым. Быйыл Башҡортостанда үткән бәйгелә "Иң яҡшы иретеп йәбештереүсе" исеменә лайыҡ булдым. Был һөнәрҙе үҙләштергәнемә үкенмәйем.
Сергей ОХОТИН, Ҡалмыҡ Республикаһы:
– Ғаиләбеҙҙе иретеп йәбештереүселәр династияһы тип атарға була. Атайым, ағайым, ҡустым, хатта улым да яҙмышын ошо һөнәр менән бәйләне, сөнки уға һәр ерҙә лә ихтыяж ҙур.
Алексей САРАЖИН, Ханты-Манси автономиялы округы:
– Өфөгә тәүге тапҡыр килеүем, һеҙҙең ҡала бик йылы тәьҫораттар ҡалдырҙы. Таҙалығы, төҙөклөгө менән һоҡландыра. Ә конкурсҡа килгәндә, ул яҡшы ойошторолдо, ярыш өсөн уңайлы шарттар булдырылды.