“Оло быуын” федераль партия проектына ярашлы “Берҙәм Рәсәй” партияһының төбәк башҡарма комитеты, “Башкомснаббанк” дәүләткә ҡарамаған пенсия фонды һәм “Берҙәм Рәсәй. Башҡортостан” гәзите редакцияһы “Лайыҡлы хеҙмәт — лайыҡлы киләсәк” төбәк социаль проектын берлектә тормошҡа ашырыу тураһындағы килешеүгә ҡул ҡуйҙы.

Рәсәйҙә пенсия бүлеү системаһын, уның тупланма өлөшөн үҙгәртеүгә, дәүләттең һәр кеше алдындағы страховка йөкләмәләрен үтәүгә йүнәлтелгән пенсия реформаһы тормошҡа ашырыла. Уның төп бурысы — пенсия системаһында финанс тигеҙлегенә өлгәшеү, шулай уҡ граждандарҙың тәьминәтен яҡшыртыу, социаль системаға өҫтәмә килем йәлеп итеү өсөн тотороҡло сығанаҡ булдырыу. Реформа эш биреүсе менән хеҙмәткәр араһындағы үҙ-ара мөнәсәбәттәрҙе тамырынан үҙгәртеүгә ҡорола. Хеҙмәткәрҙең ҡартлығын тәьмин итеү, ә эш биреүсенең страховка иғәнәләрен түләү йәһәтенән яуаплылығы артасаҡ. Күрелгән сараларға ҡарамаҫтан, ҡайһы бер етешһеҙлектәр ҙә юҡ түгел.
— Ниңә пенсия реформаһы һөҙөмтәһеҙ тормошҡа ашырыла? Сөнки кешеләр дәүләткә ҡарамаған пенсия фондтарына аҡса һалмай. Улар күп һанлы, шул уҡ ваҡытта аҙ билдәле ойошмаларға ышаныс күрһәтә. Был йәһәттән беҙ төбәк пенсия фондын ойошторғанда, республикала 21 йыл эшләгән “Башкомснаббанк”ка таяндыҡ. Уның социаль һәм пенсия программалары бик күп. Ойошма аҡсаны йыйып алып, юҡҡа сығырлыҡ бер көнлөк фирма түгел. Өҫтәүенә проект Башҡортостан Хөкүмәтендә лә хуплау таба. Республика Хөкүмәте Премьер-министры урынбаҫары Фидус Ямалетдинов “Башкомснаббанк” дәүләткә ҡарамаған пенсия фондының Попечителлек рәйесе итеп һайланды. Көнбайышта бындай фондтар ҡеүәтле ойошмалар иҫәбенә инә. Шуға күрә проект уңышлы һәм оҙайлы булыр тип ышанам. Ул күп йылдар дауамында һөҙөмтәле эшләһен өсөн бөтә мөмкинлектәрҙе файҙаланасаҡбыҙ, — тине “Берҙәм Рәсәй” партияһының төбәк башҡарма комитеты етәксеһе Альберт Мифтахов.
“Башкомснаббанк” дәүләткә ҡарамаған фонды советы рәйесе Флүр Ғәлләмов билдәләүенсә, был ойошма — төбәктәге берҙән-бер дәүләткә ҡарамаған пенсия фонды. Уның иҫәбенә күскән аҡса Башҡортостан иҡтисады файҙаһына эшләйәсәк.
— Пенсия реформаһында дәүләткә ҡарамаған фондтарға ҙур әһәмиәт бирелә. Статистикаға ярашлы, йыл һайын Рәсәй Пенсия фондынан халыҡтың 10 проценты тиерлек аҡсаһын дәүләткә ҡарамаған фондтарға күсерә. Республикабыҙҙа ла ошондай уҡ хәл күҙәтелә. “Башкомснаббанк” фонды советында тәжрибәле хеҙмәткәрҙәр эшләй. Шуға күрә әле һалынған аҡса киләсәктә пенсионерҙарға мул килем булып әйләнеп ҡайтасаҡ. “Берҙәм Рәсәй” партияһы менән хеҙмәттәшлек проекттың Башҡортостанда уңышлы тормошҡа ашырылыуына ышаныс өҫтәй, — тине Флүр Ғәлләмов.
Проектты берлектә тормошҡа ашырыу тураһындағы килешеүгә Ололар көнөндә ҡул ҡуйылыуы айырым әһәмиәткә эйә. Һуғыш ветерандарының республика клиник госпиталендә “Йәш гвардия” ағзалары байрам концерты ҡуйҙы, ветерандар менән аралашты.
Өфө ҡала Советы депутаттары, “Берҙәм Рәсәй” фракцияһы ағзалары Тимур Хәкимов менән Илдус Ғүмәров пенсионерҙар һәм Бөйөк Ватан һуғышы ветерандары өсөн байрам табыны ойошторҙо. Өлкәндәр бик ҡәнәғәт ҡалды.
— Хөрмәтле ветерандар! Ихлас ҡотлауҙарҙы ҡабул итегеҙ. Һеҙгә күңел йылылығы, ныҡлы һаулыҡ, шатлыҡ-ҡыуаныс, яҡындарығыҙҙың һөйөүен теләйбеҙ. Күк йөҙө тыныс булһын, ҡояш һәр саҡ йылмайып торһон, — тине үҙенең тәбрикләү һүҙендә Өфө ҡала Cоветы депутаты Тимур Хәкимов.