Белгестәр кәңәш биргән

Рәсәй Президентының Башҡортостан Республикаһындағы ҡабул итеү бүлмәһе белгестәре Бүздәк районында күсмә ҡабул итеү ойошторған.
Белгестәрҙең районға килеүе менән файҙаланып, 50-нән ашыу кеше ярҙам һорап мөрәжәғәт иткән. Һорауҙарҙың күбеһе Башҡортостан Республикаһы буйынса Рәсәй Пенсия фонды эшмәкәрлегенә бәйле. Өлкән йәштәгеләрҙе пенсияларҙы иҫәпләү механизмы ҡыҙыҡһындырған, “хеҙмәт ветераны” исеме алыу шарттары менән ентекләберәк танышырға теләүселәр ҙә булған. Белгестәр бер мөрәжәғәтте лә иғтибарһыҙ ҡалдырмаған.

Сүп ташлаһаң — штраф!

Рәсәй Дәүләт Думаһына автомобилдә китеп барғанда тәҙрә аша юл буйы һыҙатына сүп-сар ырғытҡан өсөн 1 мең һум күләмендә штраф түләтеү тураһындағы закон проекты ҡарауға индерелгән. Проект авторҙары тәҡдим итеүенсә, тәртип боҙоуҙың ошо төрө тураһында һәр кем хәбәр итә ала. Хәбәр итеүсе фото, аудио, видео теркәү материалынан тыш, йәшәү урыны тураһында һәм башҡа шәхси мәғлүмәттәрҙе тикшереү өсөн ризалығын да бирергә тейеш.
Әгәр мәғлүмәт ялған булып сыҡһа, ғәйепләнеүсе был кешенән әхлаҡи зыян өсөн компенсация талап итә ала. Хоҡуҡ һаҡлау органдары тәртип боҙоу тураһында хәбәр алғандан һуң, бер ай эсендә граждандарға сүп-сар ташлау осрағын тикшереү һөҙөмтәһен еткерергә тейеш. Әлеге мәлдә автомобиль тәҙрәһенән сүп-сар ташлаған өсөн яза төбәк кимәлендә генә ғәмәлгә индерелгән. Мәҫәлән, Красноярск ҡалаһында – 2 мең, Владимир өлкәһендә – 2,5 мең, Приморье крайында 3 мең һум штраф түләтәләр. Испанияла иһә автомашина тәҙрәһенән ташланған тәмәке төпсөгө өсөн 90 евро, күләмлерәк сүп-сар өсөн 200 евро, ә Америкала 2 мең долларҙы кеҫәңдән сығарырға тура киләсәк.

Хәрби хеҙмәткә саҡырыу башланды

Рәсәй Президенты Владимир Путин “2012 йылдың октябрь – декабрендә Рәсәй Федерацияһы граждандарын хәрби хеҙмәткә саҡырыу һәм саҡырыу буйынса хәрби хеҙмәт үтеүселәрҙе хәрби хеҙмәттән бушатыу тураһында”ғы Указға ҡул ҡуйҙы.
Көҙгө саҡырылышта, яҙғыһы менән сағыштырғанда, саҡырылыусылар һаны 15,4 меңгә кәмерәк буласаҡ. Ил буйынса йәмғеһе 140 меңдән ашыу егетте хәрби хеҙмәткә аласаҡтар.

Мамонт теше тапҡандар

Нефтекамала мамонт ҡалдығын тапҡандар. 8 килограмм ауырлыҡтағы һөйәк мамонт теше булып сыҡҡан.
Әлеге ваҡытта теште баш ҡалалағы Республика милли музейына тапшырғандар. Белгестәр, уны тикшереп, мамонттың йәшен асыҡлаясаҡ. Табышҡа төҙөлөш ойошмаһының бер хеҙмәткәре Кама буйынан килтергән ҡомташты бушатҡанда юлыҡҡан.

Социаль ярҙам берләштерелә

2013 йылдың 1 ғинуарынан бер нисә төр социаль ярҙам берләштереләсәк. Рәсәйҙең Хеҙмәт һәм халыҡты социаль яҡлау министрлығынан хәбәр итеүҙәренсә, ай һайын түләнгән, яңғыҙ әсәләр өсөн тәғәйенләнгән, хәрби хеҙмәткә саҡырылғандарҙың сабыйҙарына бирелгән пособиелар бергә ҡушыласаҡ.
Бынан тыш, күп балалы һәм аҙ тәьмин ителгән ғаиләләрҙең мәктәптә уҡыусы балаларына түләү күләме 410 һумға арттырыласаҡ. Был ташламаларҙы аҡсаға әйләндереү юлы менән тормошҡа ашырыласаҡ. Йәғни бушлай юл йөрөү, физкультура-спорт, мәҙәниәт өлкәһендәге хеҙмәттәргә льгота бөтөрөләсәк.
Башҡортостанда 180 мең ғаилә балалар өсөн пособие ала, улар 300 меңдән ашыу бала тәрбиәләй.

Күрше төбәктәргә бал һатабыҙ

Сентябрҙән башлап күрше төбәктәрҙә “Башҡортостан балы” көндәре үткәрелә башлаған. Беренсе йәрминкә Екатеринбург ҡалаһында ойошторолған. Артабан “баллы” эстафетаны Һамар һәм Ырымбур ҡалалары алған.
Ошо көндәрҙә Башҡортостан умартасылыҡ һәм апитерапия буйынса ғилми-тикшеренеү үҙәге белгестәре бал йәрминкәһе ойоштороу өсөн Силәбе ҡалаһына юлланасаҡ. Үрҙә телгә алынған ҡалаларҙа иһә 30 тоннанан ашыу бал һатылған. “Бындай саралар ике яҡ өсөн дә отошло. Беренсенән, беҙ башҡорт балын пропагандалайбыҙ, икенсенән, умартасыларыбыҙға йыйылған уңышты һатырға ярҙам итәбеҙ, өсөнсөнән, бал һатып алыусыларҙы сифатлы продукция менән тәьмин итәбеҙ”, – ти үҙәктең етәксеһе Әмир Ишемғолов.

Баскетбол ярышына рәхим итегеҙ!

Башҡортостан мәктәптәре араһында “КЭС-БАСКЕТ” баскетбол лигаһының яңы миҙгеле башланды.
Әлеге мәлдә бәйгелә 1217 команда ҡатнашырға теләк белдергән. Ярыштар мәктәптәрҙә апрелгә тиклем дауам итәсәк. Еңеүселәр Волга буйы федераль округы финалына барасаҡ. Команданы теркәү әле лә һуң түгел. Быны ШБЛ “КЭС-БАСКЕТ” сайтында эшләргә була.