Һуңғы осорҙа өлкән йәштәгеләргә социаль сәйәсәттең йөҙ менән боролоуы күңелдә өмөт сатҡыһы уята. Ололарҙың йәшәү сифатын яҡшыртыуға йүнәлтелгән бихисап республика программаларының барлыҡҡа килеүе, белем алыу өсөн уңайлы шарттар булдырыу, туризм һәм медицина өлкәһендә хеҙмәт күрһәтеүҙең яҡшырыуы — шуға асыҡ миҫал.

Бынан бер нисә йыл элек инвалидтар һәм хаҡлы ялдағылар өсөн социаль туризм ойоштороу мөмкинлеге тураһында ишетеп тә белмәй инек. Хәҙер ялдың был төрө ололарҙа ғәжәпләнеү ҙә, икеләнеү ҙә тыуҙырмай. Тәүге аҙымдар социаль сәйәсәттең дөрөҫ йүнәлештә барыуын раҫланы. 2011 йылда яңы программаға 30 миллион һум һалынһа, быйыл 50 миллион һумдан ашыу аҡса йүнәлтелде. Башҡортостан Президенты Рөстәм Хәмитовтың әйтеүенсә, яҡын йылдарҙа был һандың 100—120, хатта 150 миллион һумға еткерелеүе мөмкин, ошо йылдың аҙағына тиклем программала 6500-гә яҡын пенсионер һәм инвалидтың ҡатнашыуы көтөлә.
Өлкәндәр өсөн халыҡ университеты программаһы ла күптәрҙең күңеленә хуш килде. Хаҡлы ялға сыҡҡандарҙың да замандан артта ҡалғыһы килмәй. Хәйер, өҫтәмә белем алыу бер ваҡытта ла бер кемгә лә артыҡ түгел, өҫтәүенә был аралашыу, яңы дуҫтар табыу өсөн бик һәйбәт сара. Быйыл ошо маҡсатҡа 8,8 миллион һум аҡса бүленде. Йыл да 15 мең граждан үҙен ҡыҙыҡһындырған өлкә буйынса белем аласаҡ. Компьютерҙа өйрәнергә теләүселәрҙең күплеге асыҡланды, сит телдәрҙе үҙләштереү курстарына йөрөүселәр ҙә байтаҡ. Ғөмүмән, өлкәндәрҙе ҡыҙыҡһындырмаған бер өлкә лә, тармаҡ та юҡ бөгөн. Хоҡуҡ һәм финанс ғилеме, баҡса үҫтереүҙә яңы технологиялар, ғаилә психологияһы нигеҙҙәре, күп ҡатлы йорттарға идара итеү серҙәре — ололар барыһы хаҡында ла белергә, өйрәнергә теләй. Әйткәндәй, халыҡ университетын тамамлаусылар алған белемдәрен тормошта ҡулланырға ынтыла. Мәҫәлән, ҡайһы берҙәре социаль-көнкүреш салондарында эшләп, аҙ тәьмин ителгән, тулы булмаған, ишле ғаиләләргә төрлө кәрәкле хеҙмәттәр күрһәтә.
Ҡартлыҡта ла борсолмай, яҡшы шарттарҙа йәшәү, хоҡуҡтарыңдан тулыһынса файҙаланыу мөмкинме? Оло йәштәгеләрҙең медицина һәм социаль хеҙмәттәргә ихтыяжын тулыраҡ ҡәнәғәтләндереү өсөн тағы нимәләр эшләргә мөмкин булыр ине? Әле халыҡты комплекслы социаль хеҙмәтләндереү үҙәктәре “мобиль бригада”, “социаль поликлиника”, “реабилитация ҡорамалдары менән хеҙмәтләндергән прокат пункты”, “тәрбиә мәктәбе”, “социаль такси” кеүек хеҙмәттәрҙе йәйелдереү тәңгәлендә эшләй.
Социаль поликлиника хеҙмәтенән алыҫ, төпкөл ауылдарҙа йәшәүсе 25,7 меңгә яҡын кеше файҙаланырға өлгөрҙө, быйыл алты айҙа 356 кеше ярҙам алды. Ололар өсөн йыш ҡына мәрхәмәтлек акциялары ойошторола, волонтерҙар хәрәкәтенең йәнләнеүе һиҙелә.
2012—2013 йылдарҙа “Башҡортостан Республикаһында өлкән йәштәгеләрҙең тормош сифатын яҡшыртыу” программаһын тормошҡа ашырыу дауам итәсәк. Иң мөһиме — йәмәғәтселектә оло быуынға мөнәсәбәтте, уй-фекерҙе тамырынан үҙгәртеү кәрәк. Уларҙы эшкә һәләтһеҙ, социаль ярҙамға мохтаж ҡатлам рәүешендә түгел, ә әүҙем тормошҡа, оҙайлы ғүмергә ынтылып йәшәгән, мул аҡылға һәм тәжрибәгә эйә быуын итеп ҡабул иткәндә барыбыҙ ҙа оторбоҙ. Ҙур сынығыу үткән өлкәндәр беҙҙең өсөн алыштырғыһыҙ ҡиммәтле ресурс та, бары уны дөрөҫ, аҡыллы файҙаланыу шарт. Ҡарттар үҙҙәрен кәрәкһеҙ тоймаһын һәм үҙ урынын таба алмай йонсомаһын өсөн уларҙың мәнфәғәтен кем яҡларға бурыслы? Һүҙ ҙә юҡ, ҡартлыҡ өсөн йәшлек яуаплы.