Ахман ауыл Советы Ахман менән Иҫке Балыҡлы ауылдарын берләштерә, унда меңдән ашыу кеше йәшәй. Ауылға тиклем асфальт юл һалынған, һыу үткән, йорттарға “зәңгәр яғыулыҡ” ингән. Урта мәктәп, ике китапхана, фельдшер-акушерлыҡ пункты, мәҙәниәт йорто, бер нисә сауҙа нөктәһе эшләй.
Ауыл биләмәһенә халыҡ мәнфәғәте өсөн үҙен аямаған Зөлфиә Ғарифуллина етәкселек итә. Уның һәр эш көнө ниндәйҙер объектты ҡарауҙан башлана. Халыҡ менән даими осрашып, уларҙың проблемаларын сисеү буйынса эҙмә-эҙлекле эшләй. Шулай ҙа хәл итәһе мәсьәләләр ҙә етерлек. Әле юлдарҙы, зыяраттарҙы төҙөкләндереү, һыу менән тәьмин итеү ҡорамалдарын реконструкциялау буйынса ҙур эш алып барыла.
Ер пайҙарын рәсмиләштереү яйға һалынған. Халыҡтың күпселеге пайҙарын иген сәсеү өсөн “Осҡон” яуаплылығы сикләнгән йәмғиәтенә ҡуртымға биргән, ҡайһы берҙәре үҙҙәре күп йыллыҡ үлән сәскән. Ике ауылда ла шәхси хужалыҡтарҙан һөт йыйыу ойошторолған. Рәйес Ғәлләмов менән Әбәҙиә Сәғиҙуллина “Партнер” яуаплылығы сикләнгән йәмғиәтенә көн һайын туғыҙ центнерҙан ашыу һөт тапшыра.
Дәүләт ҡаҙнаһынан бүленгән аҡсаға Иҫке Балыҡлы ауылындағы Мәктәп һәм Аҡлан урамдарына ҡырсынташ түшәтелгән. Был эште “Баҡалыхимия” йәмғиәте эшсәндәре башҡарған. Ахман ауылының Үҙәк урамына заманса яҡтыртыу ҡорамалдары ҡуйылған. Киләсәктә Ахмандың Йылға аръяғы урамы ремонтланасаҡ. Шулай уҡ электр сымдарын да яңыртырға иҫәптәре бар, яңы һыу скважинаһы төҙөү ҡарала.
— Барлыҡ мәсьәләне халыҡ йыйынында хәл итәбеҙ. Тәүгеләрҙән булып янғынға ҡаршы бригада булдырҙыҡ, уға транспорт, янғын һүндереү ҡорамалдары бүлдек, хатта сирена ла ҡуйҙыҡ. Электр менән тәьмин итеүҙе реконструкциялау программаһында ҡатнашыу өсөн документтар әҙерләнек, ауыл һабантуйы үткән майҙанда сәхнә лә ҡороп ҡуйҙыҡ, — ти Зөлфиә Шәйех ҡыҙы.
Йәштәр араһында хоҡуҡ боҙоуҙарҙы иҫкәртеү маҡсатында төрлө темаға “түңәрәк өҫтәл” ойошторола, тәрбиәүи саралар үткәрелә. Сәләмәт йәшәү рәүешен пропагандалау ҙа мөһим: шахмат, волейбол, футбол ярыштарында йәштәр ҙур теләк менән ҡатнаша.