Ҡайҙа ғына барһаң да, бар ауылды нурға күмеп, матурлығы менән һәммәһен дә һоҡландырып ултырған күркәм йорттар осрай. Сираттағы геройҙарым менән дә осраҡлы ғына таныштым.
Баймаҡ районының Төрөкмән ауылына юл төшкәс, кәрәкле йортто эҙләп, яңылыштан Әлфиә менән Батыр Харрасовтарҙың өйөнә керҙек тә иҫ киткес матурлыҡтан бер аҙға баҙап ҡалдыҡ. Бар ерҙә тәртип, сәскәләрҙең күплегенән һушың китерлек, ә инде ихата эсендәге ҡоймала майлы буяуҙар менән төшөрөлгән һүрәтте күргәс, ҡыҙыҡһыныуыбыҙ бермә-бер артты, тиҙерәк хужалар менән танышырға ашыҡтыҡ.
Һүрәттәрҙе барыһын да (соланда, верандала, хатта өй эсендә) ҡыҙҙары Эльвина эшләгәнен белгәс: “Ә ул рәссаммы әллә?” — тип һорап ҡуйҙы юлдашым. Рәссам түгел икән, буласаҡ табип, әле медицина университеты студенты. Әммә бәләкәйҙән һүрәт төшөрөргә ярата, Ҡасим Дәүләткилдеев исемендәге республика художество мәктәбен тамамлаған. Йәй көндәрендә яратҡан буяуҙарына тотоноп, төрлө һүрәт эшләү менән мауыға. Ҡыҙҙарының йорттарындағы матурлыҡты үҙ ҡулдары менән тыуҙыра алыуына ата-әсә лә сикһеҙ шат. Ә Әлфиә Вәкил ҡыҙы сәскәләр үҫтереү менән йәштән шөғөлләнә. Өйҙәрендә ниндәй генә гөл юҡ! Уларҙы тәрбиәләргә кесе ҡыҙы Алһыу ҙа ярҙам итә. Өлкән ҡыҙҙары Руфина ла әсәһе юлын һайлаған, Бөрө фармацевтика училищеһын тамамлап, әле Өфө ҡалаһында эшләй. Кинйә улдары Салауатҡа ни бары һигеҙ ай, ата-әсәһе, апайҙары янында иркәләнеп, рәхәтләнеп үҫә.
Ғаилә башлығы Батыр Ғәлфәүр улы үҙ эшен асҡан. Ҡуртымға ер алып, игенселек менән шөғөлләнә. Быйыл иген үҫтереүселәргә ауыр йыл булһа ла бирешергә теләмәй. Ә йорттағы бар эш хужабикәнең иңенә төшә. Әммә барыһына ла өлгөрә Әлфиә Вәкил ҡыҙы. Ул үҙе Төрөкмән ауылы дауаханаһында эшләй, әле декрет ялында.
Ысынлап та, һәр ауылдың киләсәге тыуған ерендә төпләнеп, уға ҡот һәм йәм өҫтәп, яңы йорт һалып, балалар үҫтереп йәшәгән йәш ғаиләләргә бәйле. Әлфиә менән Батыр Харрасовтар тап шундайҙар рәтендә. Уларға ҡарап һоҡланырға, өлгө алырға кәрәк, татыу йәшәүҙәре, балаларына юғары белем бирергә тырышыуҙары, уларҙың һәләттәрен бар яҡлап асырға булышлыҡ итеүҙәре, күңелдәренә матурлыҡ һәм изгелек орлоғо һалырға ынтылыуҙары маҡтауға һәм хөрмәткә лайыҡ. Ә бит бар тәрбиә өйҙән, ата-әсәнән килә. Ояһында ни — осҡанында шул, ти халыҡ.