Әхиәр Хәкимов менән Бөтә Союз пионерҙар лагеры “Артек”ка китеп барғанда, поезда “таныштым”. Уның мажаралы ваҡиғалар тураһында “әңгәмә”һен тыңлап, ваҡыт үткәнен дә тойманым хатта. Был танышлыҡ уның “Ҡуштирәк” исемле романы ине. Шунан алып Әхиәр Хәкимов минең йөрәккә “ҡуштирәк” булып тамыр йәйҙе һәм ошо “тирәк” төбөндә “Думбра сыңы”н тыңларға, “Һауыр ҡумта”лағы данлы тарих “Өйөрмә”һенә эләгергә тура килде.
Дәүләкән районы халҡы данлы яҡташтарының береһе, Башҡортостандың халыҡ яҙыусыһы, Рәсәйҙең М. Горький, Башҡортостандың С. Юлаев исемендәге дәүләт премияһы лауреаты Әхиәр Хәкимовтың тыуған көнөн йыл һайын хөрмәтләп иҫкә ала. Быйыл оло әҙибебеҙҙең хәтер кисәһенә Башҡортостан Яҙыусылар союзынан бер төркөм ҡәләм оҫталары ла килеп төштө. Дәүләкәндәге “Әхиәр Хәкимовтың йорт-музейы” директоры Гөлүсә Арыҫланова арҙаҡлы ҡунаҡтарҙы әйҙүкләп ҡаршы алды. Кисә Рәми Ғариповтың Әхиәр Хәкимовҡа арнаған “Ут илауы” исемле шиғыры менән башланып китте. Район хакимиәте башлығының социаль мәсьәләләр буйынса урынбаҫары Ирек Тимерхан улы Ғәйнуллин, хакимиәт башлығы Закир Ғизелхаҡ улы Бикбулатовтың сәләмен еткергәндән һуң, ҡыҫҡаса ғына райондың хәле менән таныштырҙы: “Дәүләкән халҡы тулы ҡанлы тормош менән йәшәй, — тине ул. — Яңы предприятиелар асыла, эшһеҙҙәр юҡ тиерлек. Йыл ҡатмарлы килеүгә ҡарамаҫтан, мул ғына уңыш йыйып алынды”.
Башҡортостан Яҙыусылар союзы идараһы рәйесе Риф Тойғон: “Кисә генә Әхиәр ағайҙың ҡатыны Лидия апай менән һөйләшеп алдым. Ул беҙҙең бында киләсәгебеҙҙе ишетеп ҡыуанды, барығыҙға ла ҡайнар сәләмен еткереүемде һораны.
Дәүләкәндәр әҙәбиәтебеҙгә бик ихтирамлы, үҙҙәре лә рухиәтле халыҡ. Ғөмүмән, әҙәбиәт менән дуҫ кешенең эше төрлө йәһәттән дә уң була”, — тип Әхиәр Хәкимовтың йорт-музейына китаптар бүләк итте.
Әҙиптәр Йыһат Солтанов, Тимерғәле Килмөхәмәтов, Фәниә Чанышева, Азат Мағазов, Гөлнур Яҡупова, Ринат Камал, Әхмәҙин Әфтәх, Рәиф Әмиров, Фәрзәнә Аҡбулатова, Марис Нәзиров, Фәрзәнә Ғөбәйҙуллина Әхиәр Хәкимов тураһында яҡты хәтирәләре менән уртаҡлашты, әҫәрҙәрен уҡыны.
Яҙыусының йорт-музейында “Дим” әҙәби-ижад түңәрәге эшләп килә. Уның ағзаһы Гөлшат Саматова түңәрәктең эше менән таныштырып: “Беҙҙең өсөн был йорт шиғриәт Мәккәһе кеүек. Гөлүсә һылыу тырыш, музейҙың ишеге ябылғаны юҡ. Һуңғы ваҡытта, китап уҡыусылар бөтә, тигән һүҙҙәрҙе йыш ишетергә тура килә. Бының менән килешмәйем. Китап уҡыйҙар ул. Халыҡсан тел менән яҙылған, фекерле әҫәрҙәр кәштәлә саң йыйып ятмай”, — тине. Гөлшат апай Мостай Кәримдең “Сигеү сигә ҡыҙҙар” исемле шиғырын уҡып, күңелдәрҙе һағышҡа һалды, хатта күҙҙәргә йәш төйөлдө. Шулай уҡ Баймаҡ ҡыҙы, 30 йылдан ашыу Дәүләкәндә башҡорт теле һәм әҙәбиәте уҡытыусыһы булып эшләгән Миңзилә Хәлилова, Клара Ниғмәтуллина, Зөләрәм Снегирева апайҙарҙың сығышын ҡунаҡтар ихлас алҡышланы.
Башҡортостан Яҙыусылар союзы ойошторған хәтер кисәһе күңелдәрҙә яҡты хистәр ҡалдырҙы. Киләсәктә лә ошондай изге сәфәрҙәргә юл төшөп торһон.