БДУ-ның Стәрлетамаҡ филиалында физик тәрбиәгә иғтибар ҙур
Хәҙер, баҙар шарттарына ярашлы, йәш уҡытыусы, инженер йә булмаһа менеджер төрлө яҡлап үҫешкән, үҙ һөнәрен энәһенән ебенә тиклем өйрәнгән, ижади фекерләгән белгес булырға тейеш. Әммә бының өсөн һанап үтелгән “күрһәткестәр” генә етәме? Халыҡ әйтмешләй, һаулығың юҡ икән, аҡылың да, уңғанлығың да — һуҡыр бер тин. Шуға ла уҡыу йорттарының төп бурысының береһе — студентҡа белем һәм рухи тәрбиә биреү менән бер рәттән, уны физик яҡтан сыныҡтырыу. Һүҙем Башҡорт дәүләт университетының Стәрлетамаҡ филиалы хаҡында.
Филиалда ундан ашыу түңәрәк эшләй. Студенттар бигерәк тә көрәш, волейбол, саңғы спорты, еңел атлетика, йүгереү, йөҙөү, боксты үҙ итә.
Уҡыу йортонда үҙ ваҡытында бихисап данлыҡлы спортсылар белем алған. Яҡшы йола ғүмерле тигәндәй, бөгөн спорт түңәрәктәрендә тәрбиәләнеүселәр ҡала, республика һәм ил кимәлендәге төрлө ярыш-уйындарҙа уҡытыусы-остаздарының йөҙөнә ҡыҙыллыҡ килтермәй — беренселеккә лайыҡ була. Ә кескәй еңеүҙәрҙең ҙур ҡаҙаныштарға илтеүе барыбыҙға ла мәғлүм. Быйылғы уҡыу йылы дауамында ғына ла Р. Хәбибуллин, А. Дунова, З. Ҡаландарова, Д. Сәйфетдинова, Р. Йосопова, Д. Кинйәғолова, А. Федорова, Д. Мансурова, Л. Семенов, И. Исламғолова, А. Чистяков, С. Гасанов, А. Махновский, Д. Щепина, А. Ишмәтов төрлө спорт йүнәлештәре буйынса бихисап еңеү алып ҡайтты. Киләһе Олимпиада уйындарында, донъя кимәлендәге ярыштарҙа улар ҙа ҡатнашыр тип өмөтләнергә ҡала. Студенттар спорт мастерлығына кандидат, спорт мастеры исемен дә яҡлай. Әйтәйек, былтырғы уҡыу йылы Ильяс Әхмәтшинға ҙур уңыш килтерҙе — саңғысы егет спорт мастеры исеменә лайыҡ булды.
...Һүҙ башында йәш белгестең ижади һәм профессиональ һәләте генә түгел, сәләмәтлеге лә мөһим икәнлегенә ишара яһағайныҡ. Сәләмәт тәндә — сәләмәт рух, тип юҡҡа ғына әйтмәй халыҡ. Фекерҙе йомғаҡлап, шуны өҫтәр инем: быйыл вузды тамамлаусылар араһында көрәшсе, спорт мастеры Илдар Моратов та бар ине. Бөгөн ул ил алдындағы хәрби бурысын үтәй һәм махсус ғәскәрҙә (спецназ) хеҙмәт итә (ә ундай ғәскәрҙәргә һалдаттар сәләмәтлеге һәм психик торошо буйынса ғына һайлап алына). Юғары белемле, спортты үҙ иткән, әрме һынауын үткән егеткә, хеҙмәтен тултырып ҡайтҡас, лайыҡлы эш табыуы ла ауыр булмаҫ. Ысынлап та, хәҙерге заманда йәшлек менән спорт дуҫ булһа, сәләмәтлегеңде генә нығытып ҡалмайһың, ышаныслы киләсәк тә төҙөйһөң.