Атлас – тауискүҙ күбәләктәр төркөмөнә ҡарай. Донъялағы иң ҙүр күбәләктәр иҫәбенә инә. Ҡанатын йәйгәндә киңлеге 25 – 29 сантиметрға етеүе ихтимал. Көньяҡ-көнсығыш Азия, Көньяҡ Ҡытай, Таиланд һәм Индонезияның тропик, субтропик урмандарында осрай.






Балыҡтың да ниндәйе!
Дондағы Ростов ҡалаһы эргәһендәге һыу ятҡылыҡтарының береһендә Сергей Чекунов тигән кеше улдары менән балыҡ тотҡан. Уның ҡармағына... 2 килограмм 700 грамлыҡ пиранья балығы эләккән. Тропик һыу ятҡылыҡтарында көн иткән йыртҡыстың Рәсәйгә нисек килеп эләгеүе билдәһеҙ. Хәҙер уны урындағы Балыҡсылыҡ хужалығы ғилми-тикшеренеү институты белгестәре өйрәнә.





Бәләкәй донъя

Миниатюрасы Анатолий Коненко микроминиатюра сәнғәте менән өс тиҫтә йылдан ашыу шөғөлләнә. Ул дөгө, мәк бөртөктәренә, кеше сәсенә яҙыу технологияһын булдырған. Күптән түгел иһә донъялағы иң бәләкәй аквариумды эшләп хайран иткән. Быялалы пластиктан эшләнгән наноаквариумдың үлсәме – 30х24х14 миллиметр, унда ысын һыу үләндәре үҫә, һәм оҙонлоғо 4 миллиметрҙан да артмаған биш данио рерио балығы селбәрәһе йәшәй.






Африкала һыу инмәгеҙ!

Инглиз сәйәхәтсеһе Джереми Уайд Африканың Конго иле буйлап сәйәхәт ҡылған саҡта урындағы һыу ятҡылығында балыҡ тоторға ниәтләгән һәм ҡурҡыныс табышҡа юлыҡҡан. Йыртҡыс балыҡтың оҙонлоғо 1,5 метрға етә, ауыҙында береһенән-береһе осло 32 теш бар (аҡ акуланыҡынан кәм түгел). "Бындай балыҡ крокодилды ла сәйнәп йотоуы ихтимал", – ти белгестәр.








Ҡабаҡ яратһаң...

Урталағы ҡабаҡтың (һүрәттә) ауырлығы – 668 килограмм. АҠШ-тың Массачусетс штатында үткән ҡабаҡтар бәйгеһенә уны баҡсасы Билл Родонис килтергән.