Шәһит Хоҙайбирҙин исемендәге журналистар премияһын алыуға документтар тапшырыу өсөн ике аҙна ваҡыт ҡалды. Дәғүә итеүселәрҙең материалдары 1 сентябргә тиклем тапшырылырға тейеш.

Башҡортостан Хөкүмәте ҡарамағындағы Шәһит Хоҙайбирҙин исемендәге премияларҙы тапшырыу буйынса комиссия май айында документтар ҡабул ителеүе хаҡында иғлан иткәйне. Положениеға ярашлы, премия журналистарға, шулай уҡ журналист коллективтарына 2011 йылдың сентябренән быйыл авгусҡа тиклем донъя күргән журналистика өлкәһендәге иң яҡшы әҫәрҙәр өсөн бирелә.
Комиссия ҡарамағына республиканың, Рәсәй йәки сит илдәрҙең матбуғат йәки электрон киң мәғлүмәт сараларында баҫылған репортаждар, очерктар, документаль повестар һәм публицистик мәҡәләләр, телерадиотапшырыуҙар, фотоэштәр серияһы, айырым китап булып сыҡҡан материалдар ебәрергә була.
Материалдарҙа замандаштарыбыҙҙың образдары, милли мәҙәниәттәр байлығы һәм халыҡтар дуҫлығы, граждандар именлеге һәм йәмғиәттәге татыулыҡ, Башҡортостандың социаль-иҡтисади үҫеш мәсьәләләре сағылырға тейеш. Уларға түбәндәге талаптар ҡуйыла: эш иғлан ителгән темаға тап килергә, аналитик юҫыҡта яҙылырға, даими донъя күрергә, эшләнеше яғынан үҙенсәлекле булырға, объектив күҙлектән сығып, дәлилдәргә таянып яҙылырға, теманы тулыһынса асырға тейеш. Тел байлығы, аныҡ һәм аңлайышлы булыуы ла иғтибарға алына.
Премияға дәғүә итеүселәрҙең әҫәрҙәрен Башҡортостандың Журналистар союзы идараһы, айырым авторҙар, гәзит һәм журнал редакциялары, телерадиостудиялар, мәғлүмәт агентлыҡтары һәм башҡа ижади коллективтар тәҡдим итә. Журналистар союзы билдәләүенсә, эштәрҙең һаны сикләнмәгән, фотоэштәр серияһы кәмендә биш фотографиянан торорға тейеш.
Материалдар түбәндәге адрес буйынса ҡабул ителә: 450079, Өфө, Октябрҙең 50 йыллығы урамы, 13, Башҡортостан Журналистар союзы, 1007-се офис (Матбуғат йорто, 10-сы ҡат). Телефон (факс):(347) 276-42-66.