Октябрьский ҡалаһының 500-ҙән ашыу кеше көн иткән ҡарттар һәм инвалидтар йортонда һоҡланғыс ғаилә йәшәй. Гөлнур менән Юрий Вишевтар, әҙәм балаһын һындырырҙай һынауҙарҙы еңеп, бәхет кисергән.

Гөлнур Учалы районының Илсеғол ауылында донъяға килә. Ғаилә башлығы Салауат Йәғәфәров йәшләй генә баҡыйлыҡҡа күсә, йәмәғәте Зөһрә өс бала менән тороп ҡала. Гөлнур ҡыҙы, балалар церебраль фалижы менән ауырығанлыҡтан, айырым иғтибарға мохтаж була. Уҡытыусы Зөһрә ханым Гөлнурҙы 22 йәшенә тиклем тәрбиәләй, урта белемле итә.
Әсәһенең юлында бергә донъя көтөрҙәй кеше осрағас, Гөлнур ризалығын бирә. Шулай ҙа ҡәҙерле кешеһенең бәхетенә кәртә булырмын, тип борсола, сөнки үгәй атайҙың ауырыу ҡыҙҙы үҙһенеүе икеле. Бер гәзиттә Октябрьский ҡалаһындағы өлкән йәштәгеләр һәм инвалидтар өсөн интернат тураһында мәҡәлә уҡығас, шунда барырға ҡарар итә.
Тик ултырырға күнекмәгән Гөлнур. Бында килеү менән тегеү цехына эшкә урынлаша. Һуңынан көнкүреш бүлмәһенә күсә: ауырыуҙарға сәй ҡайната, ашнаҡсыларға ярҙамлаша.
Интернатта Гөлнур күңеленә ятҡан эшен генә түгел, һөйгән йәрен дә таба. Белорет ҡалаһынан килгән Юрий Вишевтың ҡулынан килмәгән һөнәре юҡ: буяусы ла, слесарь ҙа.
Бер-береһен өҙөлөп һөйгән йәрҙәр, яҡындарын йыйып, ҡаланың бер кафеһында туй мәжлесе үткәрә һәм тормош ҡороп ебәрә.
Интернат етәкселеге йәш ғаиләгә айырым бүлмә бирә. Гөлнур менән Юрий туғыҙ йыл ошонда көн күрә. Ике уңғандың йәшәгән ере гөл һымаҡ: заманса көнкүреш техникаһы, башҡа йорт кәрәк-ярағы менән йыһазландырылған.
Кешеләр менән аралашырға яратҡан матур ғаиләнең бүлмәһенән күрше-күлән өҙөлмәй. Аш-һыуға оҫта Гөлнур һәммәһен дә асыҡ сырай, ҡайнар сәй, тәм-том менән һыйламайынса сығармай. Йыш ҡына икәүләшеп концерт һәм спектаклгә йөрөргә яраталар.
Вишевтарҙы сәйәхәтсе тиергә лә мөмкин. Улар һәр йыл отпуск алып, Гөлнурҙың тыуған төйәге Илсеғолға ҡайта. Әсәһе эргәһендә бер аҙ ҡунаҡ булғас, Бөрйән тарафтарына юл тоталар. Унда Гөлнурҙың бер туған һеңлеһе Эльвира ғаиләһе менән йәшәй. Сәйәхәттән Вишевтар ҙур тәьҫораттар ала, яңы уй-ниәттәр ҡора, көс-ҡеүәт туплай.
Октябрьский ҡалаһы хакимиәте был ғаиләне торлаҡлы итмәксе икән. Яңы фатирҙа йәшәү ҡыуанысын да күрергә яҙһын уларға!