Хөрмәтле дуҫтар! Һеҙҙе борсоған һорауҙарға танылған юрист Таһир МАНСУРОВ яуап бирә. Уға мөрәжәғәт итеү өсөн һорау@mail.ru электрон адресына хат яҙып ебәрергә йәки телефон аша редакцияның дәүләт һәм хоҡуҡ бүлегенә (272-35-20) шылтыратырға мөмкин.

Күп балалы ғаиләләргә льготалар күп

— Һаумыһығыҙ! Мин — ауыл кешеһе, биш бала тәрбиәләйем. Айлыҡ пособие алабыҙ, һәм тағы ниндәйҙер льготалар бар. Шулай ҙа аныҡ ҡына ниндәй льготаға хоҡуғыбыҙ барлығын белеп бөтмәйем. Юрист ошо турала мәғлүмәт бирһә ине.


— Өс һәм унан да күберәк бала тәрбиәләгән ғаиләләр күп балалы тип иҫәпләнә. Күп балалы ғаилә статусын рәсмиләштереү өсөн һеҙгә йәшәгән урынығыҙ буйынса хеҙмәт һәм халыҡты социаль яҡлау идаралығына мөрәжәғәт итергә кәрәк.
Күмәк балалы ғаиләләргә социаль ярҙам саралары “Балалары булған граждандарға дәүләт пособиелары тураһындағы” 81-се Федераль законда һәм Башҡортостан Республикаһының “Башҡортостан Республикаһында балаға айлыҡ пособие тураһындағы” 132-се Законда билдәләнгән.
Рәсәйҙә йәшәүсе барлыҡ күп балалы ғаиләләргә ҡаралған төп льготалар:
— күп балалы ғаиләлә тәрбиәләнеүселәр балалар баҡсаһына, ғөмүмән, мәктәпкәсә учреждениеларға тәү сиратта ҡабул ителә;
— мәктәпкәсә учреждениеларҙа һәм мәктәптә улар бушлай туҡлана;
— мәктәп формаһы ла түләүһеҙ бирелә.
Шулай уҡ мәктәп уҡыусылары ҡала эсендә һәм ҡала-ара транспортта түләүһеҙ йөрөй. Айына бер тапҡыр музей, күргәҙмәләргә бушлай бара ала. 6 йәшкә тиклемге балаларға табип рецебы буйынса дарыуҙар ҙа түләүһеҙ бирелергә тейеш. Торлаҡ-коммуналь хеҙмәттәре өсөн түләүҙә күп балалы ғаиләләргә кәм тигәндә 30 процент ташлама ҡаралған. Шулай уҡ ер участкаһы алыу мөмкинлеге лә бар. Ғаиләгә 0,15 гектарҙан да кәм булмаған ер биләмәһе бирелергә тейеш.
Шәхси эшҡыуарлыҡ менән шөғөлләнеүселәр тулыһынса йәки өлөшләтә теркәлеү иғәнәләренән бушатыла. Крәҫтиән (фермер) хужалығы булдырырға теләүселәр йәки үҙ эшен асыусылар өсөн дәүләт ярҙамы ҡаралған. Мәҫәлән, һалым түләүҙән бушатыла йәки процентһыҙ ссудаға өмөт итә алаһығыҙ. Тағы ла күп балалы ғаиләләр төҙөлөш материалы алған саҡта йәки, ғөмүмән, үҙ торлағын һала башлағанда, дотацияға йәки льготалы кредитҡа өмөт итә ала.
Һеҙгә шулай уҡ “Башҡортостан Республикаһында балаларға айлыҡ пособие тураһындағы” 132-се Закондың 4-се статьяһында билдәләнгәнсә, айлыҡ пособие түләү ҡаралған. Биш һәм унан да күберәк бала тәрбиәләгән әсәләргә Башҡортостанда “Әсәлек даны” миҙалы менән бергә аҡсалата бүләк тә бирелә.