Тормош шундай бит ул: йылдар үткәс, көтмәгәндә бергә үҫкән замандаштар менән осраштыра. Шунда инде уға икенсе күҙлектән баһа бирәһең, өлгәшкән уңыштарына һөйөнәһең. Әлфит Фәррәхов менән дә күрешеүебеҙ шулай булды.

Беҙ уның менән — яҡташтар. Әлфит ҡартатай һәм ҡартәсәй тәрбиәһендә үҫте. Бер аҙ шуҡ, әммә уҡыуға тырыш ине, спортты яратты, йыр-моңға оҫталығы менән айырылып торҙо. Балтас районының Юғары Ҡарыш урта мәктәбен тамамлағас, Кушнаренко ауыл хужалығы техникумына юлланды.
Уҡыуын бүлеп, армияла хеҙмәт итеп ҡайта ул. Техникумдан һуң ауыл хужалығы институтында уҡып, агроном булыуға өлгәшә. Йәш белгесте Асҡын районының ауыл хужалығы идаралығына эшкә ебәрәләр. Күп тә үтмәй, булдыҡлы егетте райондың ХVIII партсъезд исемендәге колхозына рәйес итеп тәғәйенләйҙәр. Етәксе хужалыҡта игенселек менән малсылыҡты үҫтереүгә, иҡтисадты нығытыуға, ауылдарҙы төҙөкләндереүгә ҙур өлөш индерә. Һуңынан Өфөнөң иген комбинатында — цех начальнигы, Иглин район-ара “Сортсемовощ” берекмәһендә директор вазифаларын башҡара.
Үҙгәртеп ҡороу елдәре “Сортсемовощ”тың яҙмышын үҙенсә хәл итә. Әлфит Фәррәхов Өфөлә төпләнә. Нәҡ шул мәлдә уға баш ҡаланың Киров районындағы 1-се торлаҡ-файҙаланыу участкаһына идара итеүҙе ышанып тапшыралар. 11 йыл инде ошо яуаплы йөктө тарта ул.
“1-се торлаҡ-файҙаланыу участкаһы” яуаплылығы сикләнгән йәмғиәте баш ҡалала ғына түгел, республикала иң ҙурҙарҙан һәм алдынғыларҙан һанала. Ул хеҙмәтләндергән биләмәлә 67 йорт (48-е — күп ҡатлы) урынлашҡан, барлығы 7400 фатир иҫәпләнә. Участканың хеҙмәте һәр өйҙә кәрәк. Йыл әйләнәһенә йылы һәм һалҡын һыу килеп торһон, фатирҙар ҡотло һәм яҡты, подъездар, йорт алдары таҙа булһын, газондарҙа сәскәләр һәм йәшеллек ҡарашты иркәләһен өсөн улар ең һыҙғанып эшләй.
Йәйге осор коллектив өсөн айырыуса яуаплы. Көндәлек хәстәрлектәргә өҫтәп, инженерлыҡ селтәрҙәрен, коммуникацияларҙы йүнәтәләр һәм иҫкәртеү саралары үткәрәләр, айырым йорттарҙың түбәһен рәтләйҙәр, подъезд һәм ихаталарҙы төҙөкләндерәләр. Ғөмүмән, ҡышҡы осорҙо имен үткәреү нәҡ бөгөнгө хәстәрлектәргә бәйле.
Көн тыуғас, бер ғаилә йәшәгән йортта ла, кем әйтмешләй, мең төрлө мәшәҡәт сыға. Тотош микрорайонда тәртип һәм таҙалыҡ, халыҡҡа йәшәү өсөн уңайлы шарттар тыуҙырыу, әлбиттә, еңел түгел. Үҙем дә ошо биләмәлә йәшәгәс, йәмғиәт хеҙмәткәрҙәренең уңғанлығына таң ҡалам.
Әлфит Ғатуп улы шулай ғәҙәтләнгән: һәр көн иртәнге 7-лә участканы урап сыға, бер етешһеҙлек тә иғтибарынан ситтә ҡалмай. “Бик талапсан ул, ҡайһы саҡ ҡырыҫыраҡ та була, әммә кешенең хеҙмәтенә ғәҙел баһа бирә”, — тиҙәр коллективта уның тураһында.
Торлаҡ-коммуналь хужалыҡ — ҡатмарлы тармаҡ. Унда эшләүселәргә талаптар йылдан-йыл арта. Әйтәйек, заманса инженерлыҡ селтәрҙәре һәм коммуникациялар ябай слесарҙан хатта инженер дәрәжәһендә фекерләүҙе талап итә.
— Торлаҡ-коммуналь хужалыҡ өлкәһендә үҙ иңенә теләһә ниндәй яуаплылыҡты алырға һәләтле, тырыш кешеләр генә эшләй ала. Хеҙмәтләндереүҙә талаптар юғары. Үҙ бурысыбыҙҙы еренә еткереп башҡарырға тырышабыҙ, ә баһаны халыҡ бирә, — ти 1-се торлаҡ-файҙаланыу участкаһы директоры, Рәсәйҙең атҡаҙанған торлаҡ-коммуналь хужалыҡ хеҙмәткәре Әлфит Фәррәхов.
Тормошта ла ул — хәстәрлекле ғаилә башлығы, өлгөлө атай. Йәмәғәте менән ҡыҙҙары Эльзаны уҡытып, оло тормош юлына сығарғандар, инде ейәндәрен һөйөп шатланалар.