Ошо көндәрҙә Стәрлетамаҡта 210 урынлыҡ балалар баҡсаһы асылырға тейеш. Ул Ҡояшлы биҫтәһендә урынлашҡан. Башҡортостандың Төҙөлөш һәм архитектура буйынса дәүләт комитеты рәйесенең беренсе урынбаҫары Николай Гавва объект төҙөлөшөн тикшерҙе.

Республика Хөкүмәте аҡсаны тейешенсә бүлә, шул уҡ ваҡытта подрядсыларҙан аныҡ һөҙөмтәләр көтә, тип билдәләне ул. Яңы объекттар һалыуҙан тыш, ҡалала биш балалар баҡсаһы бинаһын реконструкциялау күҙаллана. Был Стәрлетамаҡ өсөн иң киҫкен проблемаларҙың береһен — мәктәпкәсә учреждениеларҙа урындар етмәү мәсьәләһен хәл итеү мөмкинлеген бирәсәк.
Николай Гавва ҡайһы бер башҡа объекттар төҙөлөшөн дә ҡараны. Боҙ һарайына айырым иғтибар бирелде. Уны ошо йыл аҙағында файҙаланыуға тапшырыу күҙаллана. Яңы аренала фигуралы шыуыу, шайбалы хоккей буйынса күнекмәләр үткәреләсәк. Трибуналары — 2500-гә яҡын кеше һыйҙырышлы. Комплекста шулай уҡ универсаль спорт залы урынлашасаҡ.
Бынан тыш, комитет етәксеһе урынбаҫары социаль йорттар һалыу барышын ҡараны һәм генераль подрядсыларға төҙөлөш графигына аныҡлыҡ индерергә ҡушты.