Археологтар Ирәндек итәген өйрәнә

Яңыраҡ Баймаҡ районының Семеновск ауылы эргәһендә, Ирәндек итәгендә, 25 кешенән торған археологик экспедиция үҙ эшен башланы.
Бында БДУ, БДУСИ-ның юридик факультетының тарих бүлеге студенттары, 24-се һөнәрселек лицейы уҡыусылары һәм Өфөнән килгән ғилми хеҙмәткәрҙәр бер нисә боронғо ҡурғанды тапҡан. Эҙләнеү эштәре “Ирәндек” тарих-археология һәм ландшафт музей-ҡурсаулығы проектын тормошҡа ашырыу сиктәрендә үткәрелә. Әлегә бронза быуатҡа ҡараған бала, үҫмер, оло кеше ерләнгән урындар табылған.


Башҡорт балалары өсөн үҙәк асыла

Сентябрҙән Силәбе ҡалаһында “Афарин” тип аталған балалар ижады үҙәге эшләй башлаясаҡ. Унда 6–12 йәштәге башҡорт балалары ҡабул ителәсәк. Уҡытыу программаһы өс йылға иҫәпләнгән.
Балалар башҡорт мәҙәниәтен төрлө яҡлап (халыҡ хореографияһы һәм вокалы, сәхнә телмәре, фольклор, милли йолалар, туған телдә аралашыу) өйрәнәсәк. Үҙәк ҡаланың “Кировец” кинотеатры бинаһында урынлашасаҡ. Әле унда төҙөкләндереү эше бара. Үҙәктең етәксеһе Майтап Вәлитова әйтеүенсә, бында бөгөндән егерменән ашыу кеше яҙылған, көн һайын ата-әсәләрҙән яңынан-яңы шылтыратыуҙар ҡабул ителә.


Һөт муллығы – йәйләүҙә

Борай районы хужалыҡтары һауынсылары бер тоннанан ашыу һөт һауып ала.
Мал ҡарау техника, махсус ҡоролмалар ярҙамында башҡарыла. Йәйләүҙә һауынсыларға ла уңайлы шарттар булдырылған. Мәҙинә Тимерғәлиева, Ания Закирова, Зөлфиә Вәлитова 150 баш һыйыр һауа. Көтөүселәр Мәғәфүр Муллағәлиев, Йәүҙәт Арманшин, Нәжметдин Әхмәҙиев, Федор Шафиҡов һыйырҙарҙы кисен дә көтөүлектә йөрөтә. Мал аҙығы аяҡ аҫтында булған осорҙо мөмкин тиклем файҙаланып ҡалырға тырыша улар.


Диниә назараты китап сығарасаҡ

Башҡортостан мосолмандары Диниә назараты яңы китап әҙерләй. Баҫма ойошманың 20 йыллығына арнала.
Унда мөфтийәт тарихы, уның төҙөлөшө, ислам динен уҡытыу йорттары, район һәм ҡалалар мөхтәсибиәттәре тураһында мәғлүмәт индереләсәк. Бында, рәсми документтарҙан һәм мәҡәләләрҙән тыш, фоторәсемдәргә лә ҙур урын бирелгән.


Мөхәббәт һәм тоғролоҡ өсөн

Ҡалтасы районы хакимиәте етәксеһе Рәүис Нуретдинов 54 йыл бергә ғүмер иткән Мария менән Адольф Алексеевтарға тантаналы рәүештә “Мөхәббәт һәм тоғролоҡ өсөн” миҙалын тапшырҙы.
Ғаилә башлығы Адольф Николаевич Бөрө дәүләт педагогия институтының физика-математика факультетында белем алғандан һуң, 1961 йылдан Кәлтәй мәктәбендә уҡытҡан. Ул — хеҙмәт ветераны, Кәлтәй ауыл биләмәһе депутаты. Хәләл ефете Мария менән биш ҡыҙ тәрбиәләп үҫтергән. Әле бәхетле пар 12 ейән-ейәнсәренең уңыштарына ҡыуанып йәшәй.


Үҫмерҙе йәшен һуҡҡан

Ошо көндәрҙә Балтас районының Уҫман ауылында ҙур фажиғә була. Ҡапыл көн болотлап, йәшенле ямғыр башлана. Көтөү көтөп йөрөгән үҫмерҙе йәшен һуға һәм ул шунда уҡ һәләк була.
Башҡортостан буйынса Ғәҙәттән тыш хәлдәр министрлығы йәшен ваҡытында асыҡ ерҙә, яңғыҙ ағас аҫтында ҡалмаҫҡа, һаҡланыу сараларын күрергә саҡыра.


Роберт Миһранов — чемпион!

Украинаның Скадовск ҡалаһында универсаль көрәш буйынса үткән донъя беренселегендә яҡташыбыҙ Роберт Миһранов чемпион исемен яуланы! Быға тиклем дә малай төрлө кимәлдә уҙғарылған ярыштарҙа йыш ҡатнашҡан. 12–13 йәшлектәр төркөмөндәге бәйгелә Роберт Украина һәм Финляндия спортсылары менән көрәшкән.
Миһрановтар – сәләмәт тормош алып барған, спорт яратҡан ғаилә. Роберттың олатаһы — билдәле марафонсы, ветерандар араһында еңел атлетика буйынса донъя чемпионы Рауил Миһранов ейәненең уңышына шатланып бөтә алмай.

Лилиә НУРЕТДИНОВА әҙерләне.