Быйыл баш ҡаланың Сипайлово биҫтәһендә пенсионерҙар, инвалидтар, ауыр хәлдә ҡалған, аҙ тәьмин ителгән һәм күп балалы ғаиләләргә тәғәйенләнгән социаль ашхана асылғайны. Ошондай уҡ ашхана Йәшел сауҡалыҡ биҫтәһендә уңышлы эшләй. Бында көн һайын 60 кешене төшкө аш менән һыйлайҙар. Бындай учреждениены булдырыу күптән көнүҙәк мәсьәлә булып тора ине. “Берҙәм Рәсәй” партияһы ла башланғысты хуплап сыҡты. Программа бағыусылар ярҙамында тормошҡа ашырыла.
Октябрь районында әле социаль пособие алыусылар һаны 1677-гә еткән. Шуларҙың 205-е — күп балалы ғаилә, ауыр тормош хәленә юлыҡҡан ғаиләләр һаны — 139.
Ашханаға бәлиғ булмаған өс балаһы менән яңғыҙ атай Александр Алешин да йөрөй. Ирен һәм балаларын ташлап киткән әсәйҙең ҡайҙа, нимә менән шөғөлләнгәнен алты йыл буйы асыҡлай алмайҙар. Ул өйҙән сығып киткәндә, төпсөк игеҙәктәре Анна менән Володяға ике генә йәш була. Өлкәндәре Анфисаға әле — 11 йәш. Атай кешенең даими эш урыны юҡ. Төрлө юл менән икмәк-шәкәрлек аҡса таба. Ҡайһы саҡ уныһы ла килеп сыҡмай. “Шәхси йортта йәшәгәс, күпләп картуф, һуған, кишер, помидор-ҡыяр ултыртабыҙ, ике сусҡа тотабыҙ, тауыҡтар бар. Балалар эргәмдә, ярҙамлашалар”, — ти ул. Өлкән ҡыҙы Анфиса ҡул араһына ингән инде. Үҙе эштә булғанда күршеләре Валя әбей балаларға күҙ-ҡолаҡ булып тора. “Валя әбей миңә ашарға бешерергә өйрәтте. Окрошка, төрлө салат, макарон әҙерләй беләм. Атайым гел генә билмән алып ҡайта”, — ти Анфиса. Ғаиләнең ауыр хәлен белеп, Октябрь районы хакимиәте уларға мөмкин тиклем ярҙам күрһәтергә, балаларҙың йәйге ялын ойошторорға, мәктәпкә әҙерләшергә вәғәҙә биргән.
Людмила Долгова ла һигеҙ айлыҡ бәпесе менән ошо ашхананан файҙалана. Ул дүрт баланы яңғыҙы тәрбиәләй. Ауырға ҡалғас, ире ташлап сығып киткән. Ике йыл алимент түләгәне юҡ. Биш мең һум декрет аҡсаһына өҫтәп, күп балалы ғаилә булараҡ 1500 һум социаль ярҙам ала әсә. Шул аҡсаның 3700 һумы коммуналь хеҙмәттәр өсөн түләүгә тотонола. Ҡалған 2800 һумға дүрт баланы ашатып ҡара! “Был ашхана беҙҙең ауыр хәлде аҙ булһа ла еңеләйтер тип ышанабыҙ. Исмаһам, көнөнә бер тапҡыр балаҡайҙарыма нимә ашатайым икән тип борсолорға түгел”, — тип күҙ йәштәрен йәшерҙе Людмила...