— Бисмиллаһи-рахман-рахим. Изге Рәжәб айында Башҡортостандың бик матур тарихи төбәге Хәйбуллала яңы тарихи бит асыла. Аҡъяр ауылында изге ай нуры балҡытып, мәсет манараһының ҡалҡыуы Хәйбулла районында иманлы, рухлы һәм хаҡ дин юлынан барыусы кешеләр йәшәүе тураһында бәйән итә. Мәсетте иманлы халыҡ ҙурлай — шатлыҡта ла, ҡайғыла ла Хоҙайҙан ярҙам һорап, иман йортона киләбеҙ. Ошонда дини байрамдар ойошторола, никах туйҙары үтә, сабыйҙарға исем ҡуштырыла. “Жәмиғ” мәсетенән кеше өҙөлмәҫ, яҡшылыҡҡа әйҙәүсе, йәштәр өсөн тәрбиәүи көскә эйә булған иман йортоноң ишектәре һәр кем өсөн асыҡ. Байрамығыҙ мөбәрәк булһын, — тип район мосолмандарын ҡотлаған Башҡортостан Диниә назараты рәйесе Нурмөхәмәт хәҙрәт Ниғмәтуллиндың тәбрик һүҙҙәре руханиҙар күңеленә тантаналыҡ өҫтәне.

Һабантуй көнөнә тап килгән был олуғ ваҡиға хәйбуллалар өсөн икеләтә байрамға әүерелде. Иртәнге сәғәттә оло юл сатында урынлашҡан, йәшел манаранан әллә ҡайҙан үҙенә ылыҡтырып яңғыраған аят, доғалар район мосолмандарын үҙенә саҡырҙы. Иман йортон асыу тантанаһына аҡ һаҡаллы олатайҙар һәм аҡ яулыҡлы ағинәйҙәр генә түгел, йәштәр ҙә, бала-саға ла, мәртәбәле ҡунаҡтар ҙа, күрше райондарҙан дин әһелдәре лә килгәйне.
Район хакимиәте башлығы Рөстәм Хәйруллин халыҡты күркәм ваҡиға менән ҡотлап, Иман йортон төҙөүгә өлөш индергән һәр кемгә изгелектәренең үҙҙәренә мең сауап булып әйләнеп ҡайтырына, ҡунаҡсыл Хәйбулла ерендә артабан да тыныслыҡ, күңел бөтөнлөгө һәм дуҫлыҡ хистәре тантана итәсәгенә ышаныс белдерҙе. Аҡъяр ауылының имам-мөхтәсибе Юлай хәҙрәт Юнысов, мәсетте төҙөүҙә ҙур ярҙам күрһәткән кешеләрҙең, ойошмалар һәм предприятиелар, шәхси эшҡыуарҙарҙың исемен билдәләп, уларға аҡъярҙар исеменән рәхмәт белдерҙе. Руханиҙар айырыуса ҙур матди ярҙам күрһәткән сәнәғәт предприятиелары — “Башҡортостан баҡыры”, Бүребай тау-байыҡтырыу комбинаты, Башҡортостан шахта-проходкалау идаралығы һәм Хәйбулла тау компанияһы предприятиелары хөрмәтенә ихлас ҡул сапты. Әйткәндәй, изге байрамға бер кем дә буш килмәгәйне. Һәр мосолман ғына түгел, башҡа дин кешеләре лә, район ойошмалары ла үҙ бүләктәрен тапшырҙы. Мәсет файҙаһына саҙаҡа биреүселәрҙең дә күп булыуын билдәләп үтке килә.
“Жәмиғ” мәсетен тантаналы асыу хоҡуғы район хакимиәте башлығы Рөстәм Рәүҙәт улына тапшырылды. Артабан яңы иман йортоноң изге эшен башлап ебәреп, руханиҙар доға ҡылды, вәғәздәр уҡыны һәм был ғәмәлдең оло сауабы хаҡында аңлатты.
Мәсет төҙөп, изге ғәмәл ҡылды хәйбуллалар. Барлыҡ ҡунаҡтар, руханиҙар, дин әһелдәре иман йорто тирәләй йәш үҫентеләр ултыртты.


Әғләметдин хәҙрәт ҒӘЗИЗОВ, Сибай ҡалаһының “Тәҡүә” мәсетенең имам-ҡазыйы:
— Әле Аҡъяр ауылында Аллаһы рәхмәте менән икенсе мәсетте күреп торабыҙ. Был халҡыбыҙҙың дин һәм иман юлына ҡайтыуына ишара. Мәсеттәрҙең ҡалҡыуы — оло шатлыҡ-ҡыуаныс. Хәҙер ислам дине нигеҙен ҡаҡшатыусы тармаҡтар, сектанттар баш ҡалҡыта. Улар тыныслыҡты түгел, мосолмандар араһында ҡан ҡойошто хуп күрә. Шуға күрә йәштәребеҙҙе мәсеткә йәлеп итеп, уларҙы хаҡ дин юлына, әхлаҡи һәм рухи ҡиммәттәргә әйҙәргә кәрәк.

Данир ҮЗБӘКОВ, Рәсәй Федерацияһы һәм Башҡортостан Республикаһының атҡаҙанған мәҙәниәт хеҙмәткәре (Өфө ҡалаһы):
— Бөгөнгө тантананың әһәмиәте баһалап бөткөһөҙ. Аҡъяр ауылында тышҡы, эске биҙәлеше менән һоҡландырғыс изге йорт үҫеп сыҡты. Изге динебеҙ гел яҡшылыҡҡа өндәй һәм йәш быуын өсөн дә уның тәрбиәүи көсө ифрат шифалы.

Әхмәт хәҙрәт ШӘЙӘХМӘТОВ, Әбйәлил районының имам-мөхтәсибе:
— Был район ғына түгел, барлыҡ республикабыҙ өсөн дә тарихи ваҡиға. Ислам дине — ул тәрбиә нигеҙе. Бөгөн руханиҙар ултыртҡан йәш үҫентеләр тиҙ арала тамыр йәйер, киләсәк быуын ошонда килеп, ғөрөф-ғәҙәттәребеҙҙе белеп, заман афәттәренән ары торорға өйрәнер, тип ышанам.