Баш ҡалала ял көндәре алдынан заправкаларҙа әүҙемлек күҙәтелә

Өфөлә сәғәт 12-лә мониторинг алып барылған АЗС-тарҙа 800 машина иҫәпләнде. «Ял көндәре алдынан ихтыяж ҙур булырын белдек, әммә был беҙ көткәндән дә күберәк, — тине Башҡортостандың сәнәғәт министры урынбаҫары Олег Тыщенко Республикаға идара итеү үҙәгендә үткән брифингта. — Уртаса алғанда, 20-30 машина сират көтә ине, ҡайһы берҙәрендә 60-ҡа яҡын. Яғыулыҡтың бөтә төрҙәре лә бар».

Райондарҙа хәл ҡатмарлыраҡ. Мәҫәлән, Асҡында яғыулыҡ гел етмәй. «Был транзит транспортына бәйле тип уйлайбыҙ, сөнки унда сығым ҙур. Был район һәр ваҡыт «ҡыҙыл» зонала», — тине министр урынбаҫары.

Олег Тыщенко шәхси заправкалар эшләй башлағандан һуң хәл еңеләйгән Ейәнсура районын миҫалға килтерҙе. «Хәҙер биржала бензин әллә ни ҡиммәт түгел, хаҡтар төштө, һатып алырға мөмкин. Яғыулыҡҡа һатыу хаҡтары ҡиммәтерәк булһын, ләкин кешеләр бензин  аласаҡ. Эшҡыуарҙарҙы эшкә тотонорға саҡырам», — тине министр урынбаҫары.  

Сәнәғәт министрлығы мәғлүмәттәре буйынса, республикала баҙарҙың 15-20% 290-ға яҡын бойондороҡһоҙ яғыулыҡ ҡойоу станциялары тәьмин итә.