Башҡортостанда йорт фасадында «Атлы башҡорт ҡыҙы» муралы асылды

Шишмә ҡасабаһында Шоссе урамындағы 2-се йорттоң фасадында рәсми рәүештә яңы арт-объект асылды. «Атлы башҡорт ҡыҙы» исемле мурал ҡасабаның биҙәгенә һәм уның яңы визит карточкаһына әүерелде. Был турала Шишмә районы хакимиәте башлығы Ришат Мансуров хәбәр итте.

Эштең авторы – Өфөнән һәләтле йәш рәссам Алмаз Заһретдинов. Композицияның уртаһында башҡорт милли кейемендәге ҡыҙ, ә уның эргәһендә кешенең тәбиғәт, тарих һәм тамырҙар менән айырылғыһыҙ бәйләнешен символлаштырған ат төшөрөлгән. Муралды эшләүҙә шулай уҡ рәссамдар Артур Рәхмәтов, Радик Мусин ҡатнашҡан.

Мурал 2020 йылдан Рәсәй Президентының Волга буйы федераль округындағы тулы хоҡуҡлы вәкиле Игорь Комаровтың башланғысы менән үткәрелгән Волга буйы федераль округының «ФормАРТ» урам сәнғәте фестивале барышында барлыҡҡа килде.

Республика унда беренсе йылдан алып ҡатнаша һәм һәр ваҡыт юғары һөҙөмтәләр күрһәтә. Нефтекама, Белорет, Өфө, Ағиҙел ҡалаларын ошондай рәсемдәр биҙәй, хәҙер был исемлеккә Шишмә лә ҡушылды.

Быйыл Башҡортостанда фестивалдең етенсе миҙгеле башланды, унда округ төбәктәренән 400 ғариза килде, 117-һе – Башҡортостанда йәшәүселәрҙән. Эксперт советы иң яҡшы 14 проектты һайлап алды, улар иҫәбендә Алмаз Заһретдиновтың эше лә бар.

2026 йылда фестивалдең тематикаһы Рәсәй халыҡтары берҙәмлеге йылына арналған.

Муралды асыу тантанаһын Гүзәлиә Ғиззәтуллинаның сығышы биҙәне, ул Илмир Ҡоҙабаевтың ҡурай моңона башҡорт бейеүен башҡарҙы.  

Район башлығы Ришат Мансуров күркәм сараны ойоштороусыларға, рәссамдарға, артистарға һәм, әлбиттә, идеяны хуплаған Шишмә халҡына рәхмәт белдерҙе. Хәҙер ҡасабаның яңы иҫтәлекле урыны барлыҡҡа килде, тип билдәләне ул һәм барыһын да муралды үҙ күҙҙәре менән килеп күрергә саҡырҙы.