9 майҙа Башҡортостандың баш ҡалаһында 1941-1945 йылдарҙағы Бөйөк Ватан һуғышында Еңеүҙең 81 йыллығына арналған Еңеү парады була. Республика хөкүмәте вице-премьеры Ирек Сәғитов бөгөн хөкүмәттең оператив кәңәшмәһендә тулыраҡ мәғлүмәттәр еткерҙе.

– Төп сараларҙың береһе – Октябрь проспектында көндөҙгө сәғәт 12-нән 1-гә тиклем Өфө гарнизоны хәрби хеҙмәткәрҙәренең тантаналы йөрөшө, – тип белдерҙе Ирек Сәғитов. – Унда Өфө территориаль гарнизоны хәрби хеҙмәткәрҙәре, федераль башҡарма власть органдарының территориаль органдары хеҙмәткәрҙәре, «Башҡортостан» полкы һәм С. Юлаев исемендәге батальон яугирҙәре, хәрби хәрәкәттәр һәм хәрби хеҙмәт ветерандары, уҡыу йорттары курсанттары һәм кадеттары ҡатнаша.

Уның һүҙҙәренсә, хәрбиҙәрҙән һуң Муса Гәрәев исемендәге тәүге осоу әҙерлеге мәктәп-интернаты кадеттары, «шайморатов» класы уҡыусылары, юнармеецтар һәм диңгеҙ пехотасыларының кадет кластарының (60-ар кеше) Еңеү байрағы күсермәләрен, Рәсәй Федерацияһы, Башҡортостан Республикаһы һәм Өфө ҡалаһы флагтарын күтәреп үтеүе планлаштырыла.

Парад командующийы итеп хәрби комиссар урынбаҫары полковник Ринат Латипов тәғәйенләнгән. Парадты республиканың хәрби комиссары полковник Михаил Блажевич ҡабул итә.

Артабан 16 берәмек хәрби техника үтергә тейеш, шуларҙың дүртәүһе – Бөйөк Ватан һуғышы осоронан. Парад Рәсәй һәм Башҡортостан флагтарын күтәргән Ка-32, Ка-26, Ми-8 вертолеттары һәм 5 бәләкәй авиация самолеты осошо менән тамамлана.

7 майҙа киске сәғәт 7-нән 9-ға тиклем Октябрь проспектында ер өҫтө һәм һауа техникаһы ҡатнашлығында генераль репетиция була.

Тантаналы йөрөш буйынса иң яҡшы парад расчеттары билдәләнә. Еңеүселәргә Башҡортостан Республикаһы Башлығының күсмә Кубогы һәм дипломдар тапшырыла.