Билдәле тарихсы Ҡәүи Кәримов арабыҙҙан китте

Өфөлә билдәле тарихсы, тарих фәндәре докторы, профессор Ҡәүи Кәримов 80-се йәшендә донъя ҡуйҙы. Кисә Өфөлә уның менән бәхилләштеләр, бөгөн Ҡәүи Кәрим улын тыуған яғы Тәтешле районында һуңғы юлға оҙаталар.

1969 йылда Башҡорт дәүләт университетын тамамлағандан һуң өс йыл Тәтешле урта мәктәбендә эшләй. 1972 йылда Бөрө педагогия институтына эшкә күсә, 1982 йылда кандидатлыҡ диссертацияһын яҡлай.

1986 йылдан алып уның хеҙмәт биографияһы Башҡорт дәүләт педагогия университеты менән бәйле. 1988 йылдан ситтән тороп уҡыу буйынса проректор вазифаһын биләй, 1993-1997 йылдарҙа уҡытыу-тәрбиә эштәре буйынса проректор булып эшләй. 1999-2008 йылдарҙа – башҡорт филологияһы факультеты деканы.

2001 йылда Ҡәүи Кәримовҡа профессор дәрәжәһе бирелә. 2009 йылдан Башҡортостан Фәндәр академияһында эшләй, 2010 йылдан Өфө дәүләт авиация техник университетында уҡыта.

200-ҙән ашыу ғилми хеҙмәт авторы. Фәнни тикшеренеүҙәре XVIII–XX быуаттарҙа Башҡортостанда фәндең барлыҡҡа килеү һәм үҫеш проблемаларына арналған.

«Башинформ» мәрхүмдең туғандарының һәм яҡындарының ауыр ҡайғыһын уртаҡлаша.

https://www.bashinform.ru/news/social/2026-04-01/v-ufe-ushel-iz-zhizni-izvestnyy-istorik-kavi-karimov-4635126