Башҡорт йырсыһы Гөлназ Асаева аварияла зыян күргән ҡатындың хәле тураһында хәбәр итте

Башҡортостандың атҡаҙанған артисы Гөлназ Асаева үҙенең ҡатнашлығындағы аварияла зыян күргән ҡатындың хәле хаҡында һөйләне. Йырсының һүҙҙәренсә, зыян күреүсегә тағы бер операция эшләнәсәк.

Артист үҙенең ижадын һөйөүселәргә ҡатындың ғүмере өсөн доға ҡылырға һорап мөрәжәғәт итте. Шулай уҡ ул тулыһынса авария эҙемтәләре өсөн тулыһынса яуаплы булыуын белдерҙе.

«Мин үҙемдең хаталарым өсөн яуап бирәсәкмен. Ата-әсәһенең артына йәшенгән кеше түгелмен. Улар хатта минең ҡайһы бер проблемаларымды ла белмәне, мин уларҙы үҙем хәл иттем. Һәм был осраҡта улар мине аҡларға маташмай, сөнки беҙ ғәҙеллек яғында. Мин ғәйепле, һәм үҙ язамды алырға әҙермен», — тип уртаҡлашты артист.

Республика һаулыҡ һаҡлау министрлығынан хәбәр итеүҙәренсә, әлеге ваҡытта зыян күреүсенең хәле уртаса һәм тотороҡло тип иҫәпләнә.

Иҫегеҙгә төшөрәбеҙ, йырсы Гөлназ Асаева февраль аҙағында Бәләбәй районында ҡурҡыныс аварияға тарыны. Уның һөҙөмтәһендә дүрт кеше зыян күрҙе. Артист үҙе төрлө йәрәхәттәр менән дауаханаға эләкте. Уның март башындағы концерттары кисектерелде.