Баҡраҡ ауылында Бөйөк Ватан һуғышында ҡатнашҡан яугирҙәр иҫтәлеген мәңгеләштергән мемориаль комплекс асылды. Ошо бәләкәй генә ауылдан һуғышҡа 90 кеше китеп, уларҙың 36-һы ғына иҫән-һау әйләнеп ҡайтҡан, 54-е ил азатлығы өсөн ғүмерен биргән.

Әлбиттә, баҡраҡтар был иҫтәлекле көндө оҙаҡ көттө, ябай ғына булһа ла обелиск ҡуйыу, атай-олатайҙарҙың исемен мәңгеләштереү хыялын йөрөттө. Күренекле ауылдаштары ярҙамында был уй-ниәт, ниһайәт, тормошҡа ашты. Башҡортостан Республикаһының Дәүләт Йыйылышы — Ҡоролтай депутаты, “Газ-Сервис” асыҡ акционерҙар йәмғиәтенең баш инженеры Рәйес Әхмәтша улы Күскилдинға айырыуса рәхмәтле Баҡраҡ халҡы. Ауыл уртаһындағы иң күркәм урында мемориаль комплекс төҙөү идеяһы ла уныҡы. Был ҙур эште тулыһынса атҡарып сығыуҙа уның ярҙамы һәм хеҙмәте хәл иткес булды. Фәнил Ибраһимов һәм башҡа ауылдаштар ҙа изге эштән ситтә ҡалманы.
Баҡраҡ ауылы халҡының ҡыуанысын уртаҡлашырға республикабыҙҙың финанс министры Рузалия Хисмәтуллина ла килгәйне.
— Тыуған ил азатлығы өсөн үҙҙәрен ҡорбан иткән ата-бабалар иҫтәлеген ҡәҙерләп һаҡлайһығыҙ, үҙегеҙ ҙә уларға лайыҡлы булырға тырышаһығыҙ, бының өсөн барығыҙға ла һәм ауылығыҙҙан сыҡҡан күренекле яҡташтарығыҙға рәхмәт, — тине ул.
Ғафури районы хакимиәте башлығы Рәмил Бохаровтың сығышында ла ошо фекер яңғыраны.
— Тыуған ауылының, райондың ысын патриоты Рәйес Әхмәтша улына айырым рәхмәт һүҙҙәре еткерге килә, — тине ул. — Ауылдарға газ үткәреүҙә, төҙөкләндереүҙә, башҡа социаль мәсьәләләрҙе хәл итеүҙә һәр саҡ уның ярҙамына таянабыҙ. Был комплекстың ауылдаштары күңелендә яҡты иҫтәлектәр ҡалдырған Әхмәтша Хәсән улы Күскилдиндың 100 йыллығына тура килеүе лә тәрән мәғәнәгә эйә. Яҡшы атанан яҡшы ул тыуа шул.
Бына иң тантаналы мәл етә. Мемориаль комплексты ҡаплап торған туҡыма киҫелгәс, мөһабәт мәрмәр таҡтаташҡа уйып яҙылған исем-фамилияларҙы уҡып, күңелдәр берсә ҡыуаныслы, берсә һағышлы хискә төрөндө. Кәүҙәләре сит яҡтарҙа ятып ҡалған атай-олатайҙарҙың да рухы шатланғандыр — нисәмә йылдан һуң исемдәре булһа ла тыуған ауылына ҡайтты, оло хөрмәткә лайыҡ булды. Тылдағы фиҙаҡәр хеҙмәте менән Еңеү көнөн яҡынайтҡан оло йәштәге апай-ағайҙар ҙа иғтибарҙан ситтә ҡалманы — Рузалия Сафиулла ҡыҙы менән Рәйес Әхмәтша улы уларға ҡиммәтле бүләктәр тапшырҙы.
Ошо уҡ көндө “Һаумыһығыҙ, ауылдаштар!” байрамы уҙғарылды. Матур тирмәләр ҡорған Ибраһимовтар килен төшөрөү, Мөхәмәтйәновтар сабыйға исем ҡушыу йолаһын күрһәтте. Өфөнән билдәле йырсы Рөстәм Ғиззәтуллин һәм район үҙәгенән килгән артистар матур концерт программаһы менән сығыш яһаны. Байрамда ҡатнашыр өсөн республиканың, илдең төрлө тарафтарынан ҡайтҡан ауылдаштар рәхәтләнеп күңел асты, комплексты сәскәләр менән күмде. Баҡраҡ урамдарын тултырған халыҡ араһында балаларҙың күп булыуы айырыуса ҡыуандырҙы. Һәйкәлдәр тереләр өсөн ҡуйыла бит. Йылдар үтер, батыр олатайҙарынан, күренекле ауылдаштарынан өлгө һәм фәһем алған йәш быуын киләсәктә тыуған төйәге сәскә атһын өсөн тағы ла ҙурыраҡ эштәр башҡарыр...