Башҡорт йырсыһы Элвин Грей легендар «Тыуған яҡ» хитын башҡарыу хоҡуғына эйә булды

Башҡортостандың халыҡ йырсыһы Элвин Грей ҙур ыҙғышҡа нөктә ҡуйыуы хаҡында хәбәр итте. Артист суд бәхәсенән һуң киң билдәле «Тыуған яҡ» йырын музыкаль платформаларға кире ҡайтарҙы. 

Былтыр көҙ йырҙы башҡарыу хоҡуғына эйә булған Татарстандағы бер ойошма йырсыны авторлыҡ хоҡуғын боҙоуҙа ғәйепләп, судҡа дәғүә ғаризаһы биргәйне. Ҙур суммала компенсация түләү ҙә талап ителгәйне. «Башинформ» хәбәрсеһе артистың концерт директоры менән бәйләнешкә сыҡты һәм был бәхәстең нимә менән тамамланыуын асыҡланы.

«Үҙ-ара килешеү төҙөнөк. Арбитраж суды уның шарттарын билдәләне», — тип һөйләне «Элвин Грей» лейблы вәкиле. 

Элвин Грей «Тыуған яҡ» хиты үҙенең ижадында айырыуса бер урын алып тороуын билдәләне.

«Минең өсөн айырыуса үҙенсәлекле композиция: ике халыҡ яратҡан, тотош донъя буйынса үҙ тыңлаусыларын тапҡан легендар йыр. Һәм мин был хитты үҙемсә башҡара алыуым өсөн бигерәк тә шатмын», — тип уртаҡлашты артист.

Быға тиклем Вәсилә Фәттәхованың ире Илгиз Абдраҡипов ҡатыны мәрхүм булғандан һуң ғаиләһенең нисек йәшәүе хаҡында һөйләгәйне.