Баймаҡта «Башҡорт аты» фестиваленә арналған фильм тураһында ролик күрһәтәләр

6 сентябрҙә Баймаҡ районының Граф күле буйында «Башҡорт аты» этномәҙәни фестивале ойошторола. Бында «Башҡорт аты — Башҡортостан бренды» документаль фильмының проморолигы күрһәтелә.

Фильм республиканың төрлө райондарында, шул иҫәптән Баймаҡта төшөрөлгән, сөнки бында йылҡысылыҡ традицияларын һаҡлауға етди иғтибар бүленә. Беренсе планда – Башҡортостан тәбиғәтенең гүзәллеге, башҡорт аты һәм туған тел.

Фильмға уның геройҙары – тамашасыларҙы төбәктең йолалары һәм мәҙәниәте менән таныштырған кешеләр айырым үҙенсәлек өҫтәй. Улар араһында «Ирәндек» этнотурынан Айһылыу Фәйзуллина ла бар. Ул ҡымыҙ бешеү серҙәре менән уртаҡлашһа, Рәсих Йортбәков — ат спорты, шул иҫәптән джигитовка менән шөғөлләнгән малайҙар, Алмаз Шөғөров үҙенең ҡаҙаныштары һәм ат спортын үҫтереүгә индергән өлөшө тураһында һөйләне.

Картинаны төшөрөүҙә шулай уҡ йылҡы үрсетеүселәр, ғалимдар, ҡымыҙ бешеүселәр, ат көтөүселәр, һөнәрселәр, күндән әйбер эшләү оҫталары, ауыл хужалығы тауарҙары етештереүселәр, ат спорты вәкилдәре ҡатнашты.

Документаль фильм тамашасыларҙы үҙенсәлекле башҡорт аты менән таныштырыуҙан тыш, профилле уҡыу йорттары студенттары, йәш белгестәр, йылҡысылыҡ һәм башҡорт халҡының традициялары менән ҡыҙыҡһынған һәр кем өсөн дидактик материалға әүерелергә тейеш.

Фестиваль ҡунаҡтары фильмдың тәүге кадрҙарын ҡарай һәм уның авторҙарының уй-ниәте менән яҡынданыраҡ таныша аласаҡ.

Проект Башҡортостан Башлығы гранттары ярҙамында тормошҡа ашырылған. Ул Башҡортостандың йылҡысылыҡ, ҡымыҙ эшләү һәм халыҡ кәсептәре традицияларын һаҡлауға һәм үҫтереүгә, шулай уҡ башҡорт атының брендын федераль кимәлдә танытыуға йүнәлтелгән.

https://www.bashinform.ru/news/social/2025-09-02/v-bashkirii-prezentuyut-rolik-o-filme-posvyaschyonnom-festivalyu-bashkort-aty-4369729