Республиканың тағы бер районында медицина колледжы филиалы асыла

1 сентябрҙән Хәйбулла районының Аҡъяр ауылында Сибай медицина колледжы филиалы үҙ эшен башлай.

Бөгөн матбуғат конференцияһында республиканың һаулыҡ һаҡлау министры Айрат Рәхмәтуллин ошо турала белдерҙе. Ведомство мәғлүмәттәре буйынса, бында шәфҡәт туташы эше белгестәрен әҙерләйҙәр. Беренсе курсҡа 25 студент ҡабул ителгән. Филиал Аҡъяр тау колледжында асыла, ә студенттар Аҡъяр үҙәк район дауаханаһында практика үтә. 

Әлеге ваҡытта Башҡортостанда һаулыҡ һаҡлау министрлығы етәкселегендә һигеҙ медицина колледжы селтәре һәм БДМУ ҡарамағындағы тағы бер колледж эшләй. Төп колледждарҙан тыш, Нефтекамала, Октябрьскийҙа, Учалыла һәм Мәсәғүт ауылында дүрт яңы филиал асылған, шулай уҡ Күмертауҙа Стәрлетамаҡ медицина колледжының филиалы бар.  

«Башҡортостан Башлығы ҡуйған йөкләмәгә ярашлы, медицина кадрҙары ситкә китмәһен, үҙебеҙҙең республикала ҡалһын өсөн медицина колледждары филиалдары селтәрен киңәйттек, бөгөн тотош республикала тиерлек медицина колледждары эшләй», — тине Айрат Рәхмәтуллин.

Хәҙер республиканың медицина колледждарында 8,5 меңдән ашыу студент уҡый, йыл һайын 2 меңгә яҡын кеше тамамлай, уларҙың 85% дәүләт учреждениеларына эшкә урынлаша.

Һаулыҡ һаҡлау министрлығы мәғлүмәте буйынса, республикала урта медицина хеҙмәткәрҙәре дефициты 1795 кеше тәшкил итә.

https://www.bashinform.ru/news/social/2025-08-21/esche-v-odnom-rayone-bashkirii-otkryvaetsya-filial-meditsinskogo-kolledzha-4356882