Башҡортостанда ишле ғаиләләргә балаларҙы уҡытыуҙы компенсациялау шарттары киңәйтелде

Башҡортостанда күп балалы ғаиләләргә яңы ярҙам сараһы булдырылды. Дәүләт Йыйылышы – Ҡоролтайҙың һуңғы ултырышында депутаттар законға төҙәтмәләр индерҙе. Хәҙер ишле ғаиләләр балаларын университет ҡарамағындағы колледждарҙа түләп уҡытҡан өсөн компенсация алырға хоҡуҡлы.

Республика парламенты спикеры һүҙҙәренсә, быға тиклем ата-әсәләрҙең үҙаллы техникумдарҙа һәм колледждарҙа ғына сығымдарҙың бер өлөшөн компенсациялау мөмкинлеге бар ине. Ғаилә йылына бер бала өсөн 30 мең һумға яҡын аҡсаны кире ҡайтара ала.

Яңы сара юғары уҡыу йорттары ҡарамағындағы колледждарҙа урта махсус белем алған студенттарға ла сығымдарҙың бер өлөшөн кире ҡайтарыу хоҡуғын бирә. Республикала бөтәһе 620 ошондай студент бар. Бынан тыш, улар 2024/25 уҡыу йылы өсөн дә компенсация алырға мөмкин.

Компенсация өс бәлиғ булмаған бала тәрбиәләгән ғаиләләргә генә түгел, ә 23 йәшкәсә студент балалары булғандарға ла ҡағыла. Никахта торған йәки тулыһынса дәүләт тәьминәтендә булған балалар ғына был хоҡуҡтан файҙалана алмай.