Бүздәктә 250 килограмлыҡ бәлеш бешерҙеләр

Бүздәк районында «Бәлешфест-2025» фестивале уҙҙы. Республика Башлығы һәм хөкүмәте ярҙамында бойомға ашырылған проекттың төп маҡсаты — Башҡортостан халыҡтарының милли аш-һыуҙарын һаҡлау, өйрәнеү һәм үҫтереү.

«Бәлешфест-2025» милли аш-һыу фестиваленең символы – 250 килограмм ауырлыҡтағы ҙур итле бәлеш. Тәмле ризыҡты Ҡаран ауыл советы хужабикәләре махсус сығарылған мейестә диаметры ике метрлыҡ табала бешергән.

Республика мәҙәниәт министрлығының матбуғат хеҙмәте хәбәр итеүенсә, иң беренсе булып бәлеште махсус хәрби операция геройҙары һәм уларҙың ғаилә ағзалары тәмләп ҡараны.

«Бәлешфест» фестивале – дуҫлыҡ, милли йолалар һәм ғөрөф-ғәҙәттәр аша халыҡтарҙың берләшеү байрамы. Нейроселтәрҙәр баһаһы буйынса Рәсәйҙә бер йылда ғына тиҫтәләрсә мең тонна ошо милли ризыҡ бешерелә. Был бер үк ваҡытта 250 миллионға яҡын кешене һыйларға етер ине. Ошо һан милли продукттың ни тиклем популяр булыуын күрһәтә», — тип билдәләне Башҡортостан мәҙәниәт министрлығының бүлек етәксеһе Александр Десяткин.

Байрамға килгән ҡунаҡтар милли йолалар мөхитенә сумды, халыҡ уйындарында ҡатнашты, халыҡ оҫталары күргәҙмәләре һәм ғаилә өсөн тематик майҙансыҡтар менән танышты, шулай уҡ башҡорт һәм татар эстрадаһының популяр башҡарыусылары концертын ҡараны.

Фестивалде Башҡортостандың мәҙәниәт министрлығы, Республика халыҡ ижады үҙәге, Халыҡтар дуҫлығы йорто, Бүздәк районы хакимиәте, Башҡортостан Республикаһы татарҙарының милли-мәҙәни автономияһы ойошторҙо.

https://www.bashinform.ru/news/social/2025-08-11/v-bashkirii-ispekli-gigantskiy-belesh-vesom-250-kg-4345279