Башҡортостанда «Мәктәпкә әҙерләнергә ярҙам ит» хәйриә акцияһы башлана

Изгелек марафоны 15-се тапҡыр уҙғарыла.

Акцияның маҡсаты – ауыр тормош хәлендә ҡалған ғаиләләргә балаларын яңы уҡыу йылына әҙерләргә ярҙам итеү.

1 июлдән 31 авгусҡа тиклем теләгән һәр кем аҙ тәьмин ителгән, ишле, тулы булмаған һәм һаулыҡ мөмкинлектәре сикләнгән балалар тәрбиәләгән ғаиләләргә балаларын мәктәпкә әҙерләүҙә ярҙам күрһәтә ала. Бының өсөн канцелярия тауарҙары, яҙыу һәм һүрәт төшөрөү өсөн кәрәк-яраҡтар, балалар ижады өсөн йыйылмалар һатып алып, «Ғаилә» район-ара үҙәктәренә һәм уларҙың республика ҡала-райондарында урынлашҡан бүлексәләренә тапшырырға кәрәк. Адрестарын Башҡортостандың Ғаилә порталында табырға мөмкин. Шулай уҡ яңы йәки яҡшы тороштағы портфелдәр, мәктәп формалары, дәреслектәр һәм кластан тыш уҡыу өсөн китаптар ҡабул ителә.

Йәй аҙағына йыйылған ярҙам халыҡҡа социаль ярҙам учреждениеларында иҫәптә торған ғаиләләргә тапшырыла.

Акция буйынса һорауҙарҙы «Ғаилә» үҙәктәренең 8-800-347-50-00 телефоны буйынса шылтыратып бирергә мөмкин.

https://www.bashinform.ru/news/social/2025-06-30/v-bashkirii-startuet-blagotvoritelnaya-aktsiya-pomogi-sobratsya-v-shkolu-4295808