Өфөлә Рәшит Шәкүр һәм табип Мәстүрә Саҡаева урамдары барлыҡҡа килде

Ленин районы урамдарына билдәле шағир һәм күренекле табип хөрмәтенә исем бирелде. Был ҡарарҙы Ҡала советы депутаттары сираттағы ултырышта ҡабул итте.

Рәшит Шәкүров урамы Дуҫлыҡ проспектынан башлап балерина Тамара Хоҙайбирҙина урамына тиклем. Шәкүров Рәшит Закир улы (псевдонимы Рәшит Шәкүр) – Башҡортостандың халыҡ шағиры, билдәле яҙыусы, педагог, филология фәндәре докторы, профессор, халыҡ-ара төрки академияһы академигы. Былтыр июнь айында 88-се йәшендә арабыҙҙан китте, тип яҙғайны «Башинформ».

Табип Саҡаева урамы иһә яңы биҫтәлә Дуҫлыҡ проспекты һәм Затон шоссеһы араһында. Мәстүрә Саҡаева Ҡыуатов исемендәге Республика клиник дауаханаһының бөйөр үҙәген булдырыу инициаторҙарының береһе тип һанала, һуңынан үҙе уны етәкләй. 1965 йылда уның етәкселегендә илебеҙҙә тәүге тапҡыр геморрагик биҙгәк йоҡтороу һөҙөмтәһендә киҫкен бөйөр етешмәүсәнлеге менән сирләгән кешегә гемодиализ үткәрелә. Социалистик хеҙмәт геройы һәм БАССР-ҙың атҡаҙанған табибы.

https://www.bashinform.ru/news/social/2025-06-25/v-ufe-poyavilis-ulitsy-rashita-shakura-i-vracha-sakaevoy-4290088