Өфөлә «Әйҙә уйнарға» фестивалендә башҡорт халыҡ уйындарын уйнарға мөмкин

Өфөлә балаларҙы башҡорт халыҡ уйындары донъяһы менән танышырға саҡыралар. «Әйҙә уйнарға» Бөтә Рәсәй уйынсыҡтар һәм уйындар фестивалендә Республика халыҡ ижады үҙәге милли уйындар ойоштора.

Ойоштороусылар һүҙҙәренсә, ҡатнашыусылар «Аҡ тирәк, күк тирәк», «Тирмә» кеүек халыҡ уйындарына ҡушылырға мөмкин. Балалар уҡтан атыу буйынса ярышта ҡатнашып, үҙҙәренең оҫталығын һәм мәргәнлеген тикшерә аласаҡ. Йәш ҡатнашыусыларҙы шулай уҡ күңелле «Көршәк ватыу» уйыны көтә.

Бынан тыш, кескәй тамашасылар өсөн «Һыбайлылар», «Арҡан тартыу» эстафеталары, ҡалаҡҡа йомортҡа һалып йүгереү, «Йәшерәм яулыҡ», «Күҙ бәйләш» уйындары, шулай уҡ «Минең кеүек эшлә!» музыкаль уйыны ойошторола.

«Балаларҙы традициялар менән таныштырыу баланың шәхесен формалаштырыуҙа, үҙ мәҙәниәтенә хөрмәт уятыуҙа һәм илһөйәрлек тәрбиәләүҙә ҙур роль уйнай. Милли уйындар һәм дәрестәр мөһим ҡиммәттәрҙе, белемде һәм оҫталыҡты йәш быуынға тапшырырға ярҙам итә. Бында физик әүҙемлек тә үҫешә, етеҙлек, зирәклек, иғтибарлылыҡ үҫешә», — тип билдәләне Республика Халыҡ ижады үҙәге директоры Салауат Кирәев.

Аҡмулла һәйкәле янындағы башҡорт халыҡ уйындары майҙансығы көндөҙгө 12-нән 8-гә тиклем эшләй.

Хәтерегеҙгә төшөрәбеҙ, 5-8 июндә Өфөнөң Совет майҙанында икенсе тапҡыр «Әйҙә уйнарға» Бөтә Рәсәй уйынсыҡтар һәм уйындар фестивале уҙғарыла.

https://www.bashinform.ru/news/social/2025-06-05/v-ufe-na-festivale-ayda-igrat-mozhno-sygrat-v-bashkirskie-igry-4265876