Өфөнөң яңы урамына Рамазан Өмөтбаев исеме бирелде

Өфө ҡала советы депутаттары Ленин районындағы яңы урамға күренекле дәүләт һәм йәмәғәт эшмәкәре, яҙыусы һәм публицист Рамазан Өмөтбаевтың исемен бирҙе. 

Ҡарар бөгөн ҡала Советының 51-се ултырышында ҡабул ителде, ул ҡала округы башлығы, Өфө ҡала советы рәйесе Марат Вәсимов етәкселегендә үтте.

Яңы урам «Затон-Көнсығыш» торлаҡ районында урынлашҡан һәм Шмидт, Әхмәтов урамдары, «Өфө-Затон» автомобиль юлы, Ағиҙел йылғаһы менән сикләнгән. Уның оҙонлоғо 0,7 километр тәшкил итә.

Рамазан Өмөтбаев 1924 йылдың 7 апрелендә Башҡорт АССР-ның Әлмөхәмәт ауылында тыуған. Бөйөк Ватан һуғышында ҡатнашҡан.

Һуғыштан һуң Рамазан Өмөтбаев үҙенең ғүмерен дәүләт һәм йәмәғәт эшмәкәрлегенә, шулай уҡ яҙыусылыҡ эшенә һәм публицистикаға бағышлай. Рамазан Ғимран улы – «Һылыубикә әбей» хикәйәләр йыйынтығы, «Генерал Кусимов» китабы, «Ысыҡтан эйелә ҡылған» романы һәм башҡа әҫәрҙәр авторы. Ул төрлө вазифаларҙа, шул иҫәптән Башҡорт АССР-ының Министрҙар Советы рәйесе урынбаҫары булып эшләй.

Рамазан Өмөтбаевтың эшмәкәрлеге дәүләт кимәлендә юғары баһалана – ул орден-миҙалдар менән бүләкләнә, 1994 йылда «Рәсәй Федерацияһының атҡаҙанған мәҙәниәт хеҙмәткәре» тигән маҡтаулы исемгә лайыҡ була. Рамазан Өмөтбаев – Ким Әхмәтйәнов исемендәге әҙәби премияның беренсе лауреаты. Баймаҡ ҡалаһының һәм Баймаҡ районының почетлы гражданы.

https://www.bashinform.ru/news/social/2025-04-30/v-ufe-novoy-ulitse-prisvoili-imya-ramazana-umetbaeva-4220273