Йәй айында, ғәҙәттәгесә, күп ҡатлы йорттарҙа ремонт осоро башлана. Ысынлап та, бик уңайлы мәл, көндәр ҙә йылы тора, күп кенә фатир хужалары ялға йә баҡсаһына киткән була. Мәшәҡәтле эштән һуң подъездар таҙарып ҡала, ихаталар ∂а матурайып, йәмләнеп китә. Әлбиттә, бындай бәхет күптәргә тәтемәй, эш алдан төҙөлгән һәм раҫланған график буйынса ғына башҡарыла.
Күптәр йәйге ялын фатирында ремонт яһап та үткәрә. Ҡара таңдан кискә ҡәҙәр ҡайһы саҡ унда-бында төрлө тауыштар ишетелгеләй, был иһә күршеләргә оҡшап та етмәй.
“Бына икенсе ай инде өҫкө ҡатта йәшәүсе күршем “дыр-дыр” килә. Йүнләп ял да итеп булмай, ныҡ ҡамасаулайҙар. Ундай күршеләргә бер ниндәй ҙә сара юҡмы икән?” — тип зарланғайны яңыраҡ бер дуҫым. Ә нишләп булмаһын, ти, бар ул закон.
Бына бер йылдан ашыу республикала “Граждандарҙың төнгө ваҡытта именлеген һәм тыныслығын тәьмин итеү тураһында”ғы Закон эшләй. Уға ярашлы, ғәҙәти көндәрҙә киске 11-ҙән иртәнге етегә тиклем, ә ял һәм байрам көндәрендә иртәнге туғыҙға ҡәҙәр пиротехника ҡулланырға, музыка яңғыратырға, һыҙғырырға, ҡысҡырырға һәм ремонт яһарға ярамай. Ә инде законды һанға һуҡмаған кешегә 1 мең, ойошмаларға 5 мең һум күләмендә штраф ҡаралған.
Протоколды полиция хеҙмәткәрҙәре төҙөргә тейеш, шуға ла күршеләрегеҙ ваҡытһыҙ ремонт башлаһа йәки тыныслығығыҙҙы боҙһа, ҡурҡмайынса 02-гә шылтыратығыҙ. Тағы ла бер аныҡлыҡ индерергә кәрәк булыр: полицияға хәбәр итер алдынан, бәлки, күршегеҙ менән һөйләшеп ҡарарһығыҙ. Уларҙы ла аңларға мөмкин, көнө буйы эштә, өйгә һуң ғына ҡайтып инәләр. Ә ремонт менән ҡасан булашырға һуң?
Ремонт – мәшәҡәтле эш, уның ҡасан бөтөрөн хужалар үҙҙәре лә белмәҫкә мөмкин. Кешегә ремонт яһамағыҙ тип әйтеп тә булмай. Шуға ла күршеләр менән татыу ғүмер итегеҙ. Ә, бәлки, бөгөнмө-иртәгәме һеҙ үҙегеҙ фатирығыҙҙа ремонтҡа тотонорһоғоҙ, алдағы көнөгөҙҙө уйлап эш итегеҙ.
Күп фатирлы йорттарҙың подъездарын ремонтлау күпкә еңелгә төшә. Ремонт эштәре, ғәҙәттә, иртәнге туғыҙҙа башланып, киске алтыла тамамлана, сөнки эшселәрҙең дә ғаиләһе бар, уларға ла ял кәрәк. Әгәр ҙә кисен подъезд ремонтлаусылар ныҡ шаулаһа, үҙегеҙҙең торлаҡ-коммуналь хужалығы идаралығына ялыу менән мөрәжәғәт итегеҙ. Үтенесегеҙҙе кире ҡаҡмаҫтар, моғайын, сөнки һеҙ хаҡлы. Быйыл да Торлаҡ-коммуналь хужалыҡты реформалауға булышлыҡ итеү фонды аша республикаға капиталь ремонт эштәре өсөн 500 миллион һум аҡса бүленәсәк. Республика бюджетынан да йорттарҙы ремонтлауға байтаҡ аҡса тотоноласаҡ.
Әйткәндәй, 1 июлдән һәм 1 октябрҙән Башҡортостанда ҡайһы бер түләүҙәргә тарифтар артасаҡ, газға — 15, коммуналь хеҙмәттәргә —12 һәм электр утына — 6 процент.