Башҡортостандың атҡаҙанған мәҙәниәт хеҙмәткәре Әхиәт Ғәйетбаев вафат

Өфөлә 62-се йәшендә Башҡортостандың атҡаҙанған мәҙәниәт хеҙмәткәре, Ә.Исҡужин исемендәге 9-сы балалар сәнғәт мәктәбе директоры Әхиәт Ғәйетбаев вафат булған. Был турала Ленин районы башлығы Олег Котов социаль селтәрҙәге сәхифәһендә хәбәр итә.

Әхиәт Ғәйетбаев 1963 йылда Баймаҡ районының Буранбай ауылында тыуған. Оҙаҡ йылдар Баймаҡ музыка мәктәбендә уҡытҡан. 1997 йылда Әхиәт Ғәйетбаев Өфө сәнғәт училищеһының Сибай филиалы директоры урынбаҫары итеп тәғәйенләнә. 2007 йылдан Өфөнөң 9-сы музыка мәктәбен етәкләй.

2013 йылда Әҙеһәм Исҡужин исемендәге 9-сы балалар музыка мәктәбе «Рәсәйҙең иң яҡшы 100 мәктәбе» конкурсы еңеүселәре иҫәбенә инһә, ә 2017 йылда «Рәсәйҙең иң яҡшы 100 предприятиеһы һәм ойошмаһы» конкурсы номинацияларының береһендә еңеү яулай.

Талантлы педагог һәм етәксе Әхиәт Ғәйетбаев республикала билдәле шәхес ине. Мәғариф һәм ижад өлкәһендә күп йыллыҡ һәм уңышлы хеҙмәте өсөн ул Салауат Юлаев орденына, Федераль дәүләт статистика хеҙмәтенең рәхмәт хаттарына, шулай уҡ Башҡортостандың Мәҙәниәт министрлығы, Өфө ҡалаһы һәм Ленин районы хакимиәттәренең маҡтау грамоталарына лайыҡ булды.

 «Әхиәт Ғиниәт улы мәҙәни мираҫты үҫтереүгә, һаҡлауға, лайыҡлы дауам итеүгә һәм профессиональ кадрҙар әҙерләү эшенә баһалап бөткөһөҙ өлөш индерҙе. Әхиәт Ғәйетбаев юғары кимәлдәге профессионал, ихлас һәм үҙ эшенә тоғро кеше булып хәтеремдә ҡалыр», — тип билдәләне Олег Котов.

Әхиәт Ғәйетбаев менән бәхилләшеү иртәгә, 10 апрелдә, көндөҙгө сәғәт 1-ҙә Баймаҡ районының Буранбай ауылында була.

«Башинформ» Әхиәт Ғиниәт улының туғандарының һәм яҡындарының ауыр ҡайғыһын уртаҡлаша.

Бынан алдараҡ «Ғорурланырға мөмкин» проектында Башҡортостандың атҡаҙанған мәҙәниәт хеҙмәткәре Әхиәт Ғәйетбаев хаҡында яҙып сыҡҡайнылар.

https://www.bashinform.ru/news/social/2025-04-09/v-ufe-ushel-iz-zhizni-zasluzhennyy-rabotnik-kultury-bashkirii-ahiat-gaitbaev-4190239