«Башинформ» республиканың иң күп өҙөмтә килтерелгән киң мәғлүмәт сараһы тип танылды

«Башинформ» мәғлүмәт агентлығы 2024 йылда Башҡортостандың иң күп өҙөмтә килтерелә торған киң мәғлүмәт сараһы тип танылды, тип хәбәр итә «Медиалогия» компанияһы.

Рейтинг компанияның цитата килтереү индексына нигеҙләнеп төҙөлгән. «Башинформ»дың – 274,04. Тәүгеләр рәтендә шулай уҡ Mkset (236,23) һәм Уфатайм (235,01) . Башҡортостан юлдаш телевидениеһы дүртенсе баҫҡысты биләй – 189,89. Хәтерегеҙгә төшөрәбеҙ, 2023 йыл йомғаҡтары буйынса ла «Башинформ» «Медиалогия» рейтингында республиканың иң күп цитаталар килтерелә торған киң мәғлүмәт сараһы тип билдәләнгәйне.

«Башинформ» һәр ваҡыттағыса цитата килтереү буйынса республикала алдынғы урынды һаҡлап ҡала. «Медиалогия» рейтингында беренсе урын «Башинформ»дың дөрөҫ мәғлүмәт сығанағы булып тороуын раҫлай. Редакция материалдар әҙерләгәндә факттарҙы ентекле тикшерә, мәғлүмәт еткереү стиленә айырыуса иғтибар бүлә. Был йәнә бер тапҡыр ғәҙел эшләгән киң мәғлүмәт сараһының уңышҡа өлгәшеүен дәлилләй», – тине Башҡортостандың Матбуғат һәм киң мәғлүмәт саралары агентлығы етәксеһенең беренсе урынбаҫары Елена Арямнова.

«Башинформ» мәғлүмәт агентлығы һуңғы йылдарҙа цитата килтереү һәм ҡарау буйынса республика медиаресурстары араһында алдынғы позицияларҙы һаҡлап килә. Дәүләт киң мәғлүмәт сараһы булараҡ, халыҡҡа властың нимә менән шөғөлләнеүе тураһында ентекле, дөрөҫ мәғлүмәт еткереү генә түгел, ә ни өсөн икәнен аңлатыуҙы ла төп бурысыбыҙ тип иҫәпләйбеҙ. Беҙ халыҡҡа нимә ҡыҙыҡлы, шул хаҡта яҙабыҙ», – тип билдәләне «Башинформ» мәғлүмәт агентлығының баш мөхәррире Руслан Шәрәфетдинов.

https://www.bashinform.ru/news/social/2025-04-08/bashinform-priznan-samym-tsitiruemym-smi-bashkirii-4189067