Башҡортостан буйлап «Сәләмәтлек поездары» юлға сыға

Быйыл «Сәләмәтлек поездары»ның сираттағы эш миҙгеле 21 апрелдә башлана, тип хәбәр иттеләр Башҡортостандың Һаулыҡ һаҡлау министрлығынан. Күсмә медицина комплекстары республика райондарына сыға. Йәмғеһе алты маршрут ойошторола.

Өфө маршрутына ун район ҡарай: Иглин, Шишмә, Архангел, Ҡырмыҫҡалы, Благовещен, Благовар, Кушнаренко, Саҡмағош, Нуриман һәм Өфө райондары.

Дыуан маршрутына биш район ингән: Дыуан, Мәсетле, Балаҡатай, Ҡыйғы һәм Салауат райондары.

Нефтекама маршрутында 12 район: Илеш, Дүртөйлө, Ҡалтасы, Тәтешле, Яңауыл, Краснокама, Борай, Балтас, Асҡын, Ҡариҙел, Мишкә, Бөрө райондары һәм Нефтекама ҡала округы.

Октябрьский маршрутына 9 район ҡарай: Туймазы, Бүздәк, Баҡалы, Йәрмәкәй, Бәләбәй, Бишбүләк, Миәкә, Дәүләкән һәм Шаран райондары.

Стәрлетамаҡ маршрутында ун бер район: Ауырғазы, Ғафури, Әлшәй, Ишембай, Стәрлебаш, Стәрлетамаҡ, Мәләүез, Көйөргәҙе, Федоровка, Күгәрсен һәм Ейәнсура райондары.

Белорет маршрутына ете район ингән: Белорет, Учалы, Әбйәлил, Бөрйән, Баймаҡ, Йылайыр һәм Хәйбулла райондары.

Ағымдағы миҙгелгә тулыраҡ график – бында.

«Сәләмәт республика — сәләмәт төбәк» акцияһы Башҡортостан Башлығы Радий Хәбировтың ҡушыуы буйынса ойошторола. 2025 йылда ул етенсе тапҡыр үткәрелә. Хәбәр иткәнебеҙсә, 2024 йылда «Сәләмәтлек поездары» 170 меңгә яҡын кешене ҡабул иткән һәм 4 меңдән ашыу етди сирҙе асыҡлаған.

https://www.bashinform.ru/news/social/2025-04-04/stala-izvestno-kogda-v-bashkirii-snova-zarabotayut-poezda-zdorovya-4183848