Аҙау ауылында ташҡын ваҡытында ауылдаштарына әүҙем ярҙам күрһәткәндәр миҙалдар менән бүләкләнә

Архангел районында тәбиғәт ғәрәсәтенә тәүгеләрҙән булып ҡаршы торған һәм ауылдаштарына, ҡотҡарыусыларға ярҙам иткән Аҙау ауылы әүҙемселәре Рәсәй Ғәҙәттән тыш хәлдәр министрлығының миҙалдары менән бүләкләнә. Был хаҡта БСТ телеканалы эфирында Башҡортостан буйынса Ғәҙәттән тыш хәлдәр министрлығы етәксеһе вазифаһын ваҡытлыса башҡарыусы Эдуард Иҙрисов белдерҙе. Инйәр йылғаһы буйында урынлашҡан Аҙау ауылы ташҡындың беренсе тулҡынының иң ҡыҙыу нөктәһе булды.

Эдуард Иҙрисов әйтеүенсә, тап Аҙауҙа һыу баҫыуға бер көн ҡалғас Ғәҙәттән тыш хәлдәр министрлығы көстәренең Бөтә Рәсәй күнекмәһе үтте, ләкин сценарий буйынса Өфө һыу аҫтында ҡалды. Баш ҡалала ла күп йылдар эсендә тәүге тапҡыр боҙ тығылды, Ағиҙел йылғаһы ҡапыл таша башланы. Боҙ шартлатыу эштәрен башҡарыу проблеманы тиҙ арала хәл итергә мөмкинлек бирҙе.

Аҙауҙа 50 йылдан ашыу ошондай көслө ташҡын булманы, тип билдәләне Эдуард Иҙрисов, ҡабат бындай хәл булмаҫ тип бер кем дә гарантия бирә алмай.

«Инйәр, Еҙем, Йүрүҙән кеүек тау йылғаларында хәл бер нисә минут эсендә үҙгәрергә мөмкин. Шуға күрә халыҡҡа властарҙың һәм ҡотҡарыусыларҙың тәҡдимдәрен тыңларға, алданыраҡ эвакуацияланырға кәрәк», — тип кәңәш бирҙе Башҡортостан буйынса Ғәҙәттән тыш хәлдәр министрлығы етәксеһе.

https://www.bashinform.ru/news/social/2025-03-25/v-bashkirii-otlichivshihsya-zhiteley-azovo-nagradyat-medalyami-mchs-4172196