Быйыл республикала урыҫ теленән Берҙәм дәүләт имтиханын 26 041 кеше тапшырҙы. 100 балл берәүҙә лә юҡ. Ә 676 уҡыусы минималь балды ла (35) йыя алманы.

“Апелляцияға биргәндәрҙең араһында һынауҙы “икеле”гә тапшырғандар ҙа күптер. Улар нимәгә ризаһыҙлыҡ белдерә икән?” тигән ҡыҙыҡһыныу менән Башҡортостан Мәғарифты үҫтереү институтына юлландыҡ. Әммә бында хәл бөтөнләй икенсе булып сыҡты.
— Апелляцияға 350 тирәһе ғариза ҡабул иттек. Уларҙың берәүһе генә минималь балл йыя алмаған уҡыусынан, — ти урыҫ теле буйынса республика предмет имтихан комиссияһының рәйесе Әлмира Ямалетдинова. — Күптәр бында дәғүә белдереү ниәте менән түгел, ә үҙ эшенә күҙ һалырға, танышырға килә.
Һәр эште айырым өҫтәлдә ике эксперт баһалай. Өфөнән Даниил Волков олатаһы менән килгән. Егет имтиханда 76 балл йыйған. Эшенең “б” өлөшөндә хата бөтөнләй юҡ. Иншаны ла 18 балға баһалағандар (әйтеүҙәренсә, был — юғары һөҙөмтә). Әммә тәүге өлөштә дүрт хата ебәрелгән. Даниил ошоноң өсөн дөйөм баһаны ныҡ кәметеүҙәренә ризаһыҙлыҡ белдереп, комиссия ағзаһы менән байтаҡ ҡына әңгәмәләште, үҙ фекерен ҡыйыу яҡланы. Һөҙөмтәлә килешмәүгә нигеҙ юҡлығы асыҡланды, ике яҡ уртаҡ һығымтаға килде.
— Комиссия ағзалары дәғүәмдең дөрөҫ булмауына ышандырҙы, — тине ул беҙгә. — Хаталарға анализ яһап, бик яҡшы аңлатып бирҙеләр. Шулай ҙа бында килеүемде “бушҡа ваҡыт уҙғарыу” тип атамайым. Эшемдең һөҙөмтәһен, уның ғәҙел баһаланыуын күреп, күңелем тынысланды.
Салауат ҡалаһынан Евгений Сидоров та 76 балл йыйған. “Был минең өсөн көтөлмәгәнсә булды, — ти ул. — Юғарыраҡ баһа көтә инем”. Ысынлап та, Салауат егетенең һүҙе ниндәйҙер кимәлдә өҫкә сыҡты — эшенә өс балл өҫтәргә ҡарар иттеләр. “Алыҫтан килеүем юҡҡа булманы. Өс балл да һәйбәт ул”, — тип ҡәнәғәтлеген йәшерә алманы Евгений.
Ә бына Өфөнән бер әсә (исемен яҙмауҙы һораны) комиссия ағзалары менән бер нисек тә риза булмайынса ҡайтып китте. Ҡыҙы 72 балл йыйған.
— Һанап ҡарауымса, 80-дән ашыу булырға тейеш, — тип сыҡҡас та тыныслана алмай ҡаңғырҙы әсә. — Балды нисек һанайҙарҙыр, белмәҫһең...
Тағы ла бер ҡатын иғтибарҙы йәлеп итте. Ике сәғәткә яҡын сыҡмайынса, комиссия ағзаларын хәлдән тайҙырған әсә беҙҙең дә күңелде төшөрҙө. “Гәзит кешеләре менән һөйләшмәйем мин!” — тип фырт ҡына китеп барҙы. Проблемаһы шулай ҙур булһа, ғәҙелһеҙлектән йөрәге әрнеһә, уй-хисен уртаҡлашмайынса ҡалмаҫ ине, моғайын.
Ғөмүмән, апелляция, ҡайһы бер ата-әсәнең үҙ һүҙен бирмәй ныҡышыуына ҡарамаҫтан, бик тыныс шарттарҙа барҙы. Бында ҡабул итеүселәрҙең үҙ һөнәренең оҫтаһы, кешелекле, ипле булыуы ҙур роль уйнаны. Төшкә ҡәҙәр барыуыбыҙ сәбәпле, килгәндәрҙең күбеһе Өфөнән булды.
— Райондыҡылар ҙа байтаҡ. Тик улар көндөң икенсе яртыһына ҡалыусан, — тине комиссия ағзалары.
Уҡыусыларҙың сит телдәр һәм химия буйынса Берҙәм дәүләт имтиханы һөҙөмтәһе лә билдәле булды. Балл менән риза булмағандар бөгөн иртәнге 9-ҙан киске 6-ға ҡәҙәр Башҡортостан Мәғарифты үҫтереү институтында (Өфө ҡалаһы, Минһажев урамы, 120) апелляцияға ғариза бирә ала, [email protected] электрон адресына ла ебәрергә мөмкин.