Башҡортостанда матур датала 281 пар өйләнешкән

Башҡортостанда матур датала – 2025 йылдың 25 ғинуарында 281 пар никахтарын теркәгән. Был хаҡта республика Юстиция эштәре буйынса дәүләт комитетының матбуғат хеҙмәтенән хәбәр иттеләр.

Яңы йылдың беренсе матур датаһы шәмбегә тура килгәс, был көндө өйләнешкән йәштәр ҙә күп булған. Мәҫәлән, Өфөлә 25 ғинуарҙа 100 пар сәстәрен сәскә бәйләгән. Әйтәйек, 16 пар – Совет районының ЗАГС бүлегендә, 15-е – Киров районында, 14-е – Октябрь районының беренсе ЗАГС бүлегендә һәм Ленин районының ЗАГС бүлегендә теркәлгән.

Республика буйынса теркәлгән никахтар һаны буйынса тәүге урында – Белорет районы һәм ҡалаһының ЗАГС бүлеге (15 никах), икенселә – Октябрьский ҡалаһының ЗАГС бүлеге, унда 13 пар өйләнешкән.

 Ә райондар араһында иң күбе Иглиндә теркәлгән – 11 никах.

Ведомствола белдереүҙәренсә, 2025 йылдың 25 майы йәкшәмбегә тура килһә лә, республика ЗАГС-тары эшләй һәм никахтарҙы теркәй. 2025 йылдың 25 майында өйләнешеү өсөн Өфөнөң Дим районы ЗАГС бүлегенә ғариза бирергә кәрәк.

Хәбәр иткәнебеҙсә, Башҡортостан – никахтар һәм тыуым буйынса тәүге 10 төбәк иҫәбендә. 

https://www.bashinform.ru/news/social/2025-01-27/v-krasivuyu-datu-25-01-2025-v-bashkirii-pozhenilis-281-para-4098338